குருஜி - வைரவாக்கியம்

ஒரு ஒளியைப் பார்த்து இன்னொரு ஒளி ஒளிபெறாது.

குருஜி

செவ்வாய்க்கிழமை, 17 July 2018 20:40

ஞான பண்டிதன் சபா!

ஓம்நமசிவய!

நாரணன் முன் பணிந்தேத்த நின்று எல்லை நடாவிய அத்
தோரணவும் திரு நாரையூர் மன்னு சிவன்மகனே,
காரணனே, எம் கணபதியே, நற் கரிவதனா,
ஆரண நுண்பொருளே, என்பவர்க்கில்லை அல்லல்களே!

####

ஞான பண்டிதன் சபா!

முருகன்!

சனத்குமாரர் கண்ட கனவு!

பிரம்மாவின் மானசீக புத்திரரான சனத்குமாரர் ஒரு வித்தியாசமான கனவு கண்டார். அதில் தேவர்களுக்கும் அசுரர்களுக்கும் சண்டை நடப்பதாகவும் அதில் தேவர்கள் சேனாபதியாகத் தான் நின்று அசுரர்களை அழிதத்தாகவும் கண்டார். இது பற்றி தந்தையிடம் வினவ, பிரம்மா, நீ பூர்வ ஜென்மத்தில் தேவாசுரப் போரில் சேனாதிபதியாக இருந்து தேவர்களைக் கொடுமைப் படுத்தும் அரக்கர்களை அழிக்க வேண்டும் என நினைத்தாய். அந்தப் பிறவியின் எண்ணங்கள் பிரதிபலித்ததே இந்தக் கனவு. இந்த ஜென்மத்தில் நீ பிரம்ம ஞானியாய் இருப்பதால் இன்னொரு ஜென்மத்தில் அந்த எண்ணங்களும் அதனால் உண்டான இந்தக் கனவும் நிறைவேறும் என்றார். சனத்குமாரர் தொடர்ந்து தியானத்திலேயே இருந்ததால் கனவைப் பற்றி நினைக்க வில்லை. ஆனால் காரண கர்த்தாவான சிவன் நினைத்தார்.

ஈசன் கேட்ட புத்திர பாக்கியம்!

சனத்குமாரர் தன்னை குறித்து தவம் செய்யாதபோதும் அவருக்கு அம்பிகையுடன் காட்சி கொடுத்தும், தியானத்தினால் சகலமும் பிரம்மமாகக் காட்சி அளிக்கும் நிலையில் ஈஸ்வர தரிசனத்தை உணராத நிலையில் சனத்குமாரர் காட்சி கொடுத்தவர்களை பூஜிக்கவில்லை. தியானம் என்றால் அப்படியொரு தியானம். சிவன் தன்னை பூஜிக்காததால் சபித்துவிடப்போவதாக கோபம் கொண்டவர் போல கூற, சனத்குமாரர் “உம் சாபம் என்னையோ என் ஆன்மாவையோ பாதிக்காது” என்றார். அவரது ஞானத்தை அறிந்த சிவன் இந்தப் பிறவியில் பிரம்ம புத்திரராக பிறந்த அவரை இன்னொரு ஜன்மத்தில் தன் புத்திரானாக பிறக்க கேட்டுக் கொள்ள சனத்குமாரர் சம்மதம் தெரிவித்தார். எத்தனையோ பேருக்கு புத்திர பாக்கியம் அருளும் ஈசன் தனக்கு கேட்ட புத்திர பாக்கியம் இது.

பிரம்மபுத்திரன்-சிவபுத்திரன்!

ஈசனோடு எழுந்தருளியிருக்கும் தன்னைப் பார்த்து சனத்குமாரர் ஏதும் கூறாததால் உமை வருத்தமுற்றதை உணர்ந்த சனத்குமாரர், “கேட்காதவர்களுக்கு எதையும் தரக்கூடாது” என்கிறது சாஸ்திரம். எனக்குப் புத்திரனாகப் பிறக்க வேண்டும் என்று ஈசன் மட்டும் கேட்டார், தேவி கேட்கவில்லை, அதனால் ஈசன் மட்டும் என்னை உற்பவிக்கச் செய்து கொள்ளட்டும் என்றார் சனத்குமார். என்ன வித்தியாசமான வேண்டுகோள். தாயில்லாமற் பிள்ளையா! உடனே உமை “சாஸ்திரங்களில் பதியையும் பத்தினியையும் ஒன்றாகத்தான் சொல்லப்பட்டிருக்கின்றது. அதனால் நான் கேட்காவிட்டாலும் நீ எனக்கும் புத்திரனாக வரத்தான் வேண்டும்” என்றாள். சனத்குமரர், ”எனக்கு ஸ்திரீபுருஷ சம்பந்தத்தில் பிறப்பதில் விருப்பமில்லை. உங்கள் பதி மட்டுமே என்னை ஜனிக்கச் செய்யட்டும்” என்றார். இதைக் கேட்ட சிவன் புன்னகைக் கொண்டார். அவருக்குத் தெரியும். இது முன்கூட்டியே நிர்ணயக்கப் பட்டது என்று.

தேவர்கள் மனைவியிடம் கரு ஏற்படக்கூடாது என சபம்!.

பிரம்மாவிடம் பெற்ற வரத்தின்படி பார்வதி தன் கருமை நிறம்மாறி பொன்னிற மேனியாளாக வர சிவனும் பார்வதியும் ஆனந்தமாக இருக்க உலகம் இருண்டது. பார்வதி பரமேஸ்வரருக்கு குழந்தை பிறந்தால் அது சொர்க்க ராஜ்யத்தைக் கைப்பற்றும் என்பதால் பயமுற்ற இந்திரன் தேவர்களுடன்கூடி ஆலோசனை செய்தான். உமா சங்கரின் ஏகாந்தத்தைக் கெடுக்க அக்னியை அன்னப் பறவை வடிவில் அனுப்பி தேவர்கள் வெளியில் காத்திருக்கும் தகவலைச் சொல்லச் சொன்னான். சிவன் வெளியில் வந்தார். உலகம் இருண்டு வருகிறது. தங்கள் மோகத்தை விடாவிட்டால் எல்லாம் தலைகீழாகும் என்றனர். புரிந்த காமேஸ்வரரான சிவன் என் வீர்யத்தை யார் சுமப்பர் எனக் கேட்க அக்னி அதற்கும் முன்வந்தான். இதனால் கோபமடைந்த பார்வதி தங்களின் தனிமையைக் கெடுத்த தேவர்கள் யாருக்கும் அவரவர் மனைவியிடம் கரு ஏற்படக்கூடாது என சபித்தாள்.

உமையின் வேண்டுகோள்!

கயிலையில் ஒர்நாள் பார்வதி சிவனை நோக்கி தங்களை நிந்தனை செய்த தட்சனின் மகளாகப் பிறந்து தாட்சாயணி என்ற பெயரை நான் சுமக்க விரும்ப வில்லை. இந்த தேகத்தைக் கரைக்க விரும்புகின்றேன் என்றாள். உன்னை மகளாக அடைய இமவான் தவமிருக்கின்றான். நீ அவனுக்கு மகளாய் பிறப்பாய். தக்க தருணத்தில் நான் உன்னை மணப்பேன் என்றார். இமவான் மகளாகப் பிறந்து பார்வதி என்று அழைத்து இமவான் ஆனந்தித்தனர். பார்வதி வயது வந்தவுடன் சிவனை நோக்கித் தவமிருந்தார்.

சிவன் பஸ்மாசூரனுக்கு வரம் கொடுத்து அவன் அதைச் சோதிக்க வந்தபோது அந்தர் தியானமானார். சிவனைக் கானாத உமை அவர் பிரிவால் வருந்தி உருகி ஓர் நீர் நிலையானாள். அந்த நீர் நிலையே சரவணப் பொய்கையாகும். தேவியின் சரீரமே சரவணப் பொய்கை. பாஸ்மாசுரனை மோகினி உருக்கொண்டு திருமால் அழித்ததும் ஈசன் வெளிப்பட்டார். தியானத்தில் இமயமலைச் சாரலில் ஓர் குடிலில் தவம் செய்ய அமர்ந்திருந்தார்.

சிவனார் இமயமலைச் சாரலில் தவம் புரிவதை அறிந்த பார்வதி அக்குடிலுக்குச் சென்று அவருக்கு இடையூறு செய்யாமல் பணிவிடை செய்ய விரும்பி தன் தந்தை இமவான் அனுமதியுடன் குடிலுக்குச் சென்று அவர் பாதங்களில் மலர்களைச் சமர்பித்து அருகிலேயே அமர்ந்திருந்தாள்..

பிரஜாபதிகள் பிரம்மனின் மானஸ புத்திரர்கள். இவர்களில் ஒருவரான காசியப முனிவர்-திதி என்ற பெண்ணின் வழியாகப் பிறந்தவர்கள் அசுர குலத்தவர்கள். அசுர குரு சுக்கிராச்சாரியாரால் ஏவப்பட்ட மாயை என்ற பெண்ணுக்கும் பிறந்தவர்கள் சூரபத்மன், சிங்கமுகன், யானைத் தலையுடைய தாரகன், ஆட்டின் தலைகொண்ட அஜமுகி(பெண்) முன் ஜென்மத்தில் சிவபெருமானால் கொல்லப்பட்ட தட்சனே மறு ஜென்மத்தில் சூரபத்மன்

சூரபதுமன், சிங்கமுகாசூரன், தாரகாசுரன் என்ற மூவரும் தேவர்களை எதிரியாகக் கொண்டு அவர்களை அழிக்க ஈசனை நோக்கித் தவமிருந்து சாகாவரம் வேண்டினர். சிவன் பூமியில் பிறந்த அனைத்து உயிர்களும் இறந்துதான் ஆகவேண்டும். அதனால் வேறு வரம் கேட்குமாறு கூறினார், உங்களுக்குச் சமமான ஒருவன், பெண் சம்பந்தமில்லாமல் தோன்றியவனால் மட்டுமே எங்கள் அழிவு ஏற்படவேண்டும் என்றனர். அவ்வாறே சிவ வரம் பெற்ற அசுரர்கள் அஷ்ட திக்பாலகர்கள், சூரியன், சந்திரன், தேவர்கள் அனைவரையும் தங்கள் கட்டுப்பாட்டில் வைத்திருந்தனர். இந்திரனும் இந்திராணியும் பூ வடிவெடுத்து மறைந்தனர். இந்திரன் மகன் ஜெயந்திரன் சிறைப்பட்டான். தேவர்கள் பெருமாளிடம் முறையிட்டனர்.

அப்போது ஈசன் தியானத்தில் இருப்பதை உணர்ந்த பெருமாள், ஈசனும் அன்னையும் தனித்தனியே தவமிருந்தால் வரம் பெற்ற சூரபதும சகோதர்களை சம்ஹாரம் செய்ய குமரன் தோன்றுவது எப்படி என ஆலோசித்து நாரதரின் யோசனைப்படி மன்மதனை அழைத்து சிவன்மீது மலர் பாணத்தை எய்யச் சொன்னார். முதலில் மறுத்த மன்மதன் உலக நன்மைக்காக தன்னிடமிருந்த தனது சேனைகளான வசந்தகாலம், இனிய நறுமனம், பூக்களின் மகரந்தப் பொடி, மிகிழ்ச்சிகரமான சூழல் ஆகியவை கொண்டு கயிலை வந்தான். அவன் வந்ததும் மலர்கள் பூத்து இனிமையான சூழல் உருவானது. கரும்பு வில்லை வளைத்து மலர் அம்பை சிவன்மேல் செலுத்தினான்.

யோக நிஷ்டை கலைந்த சிவன் கண்விழிக்க மன்மத பாணமகிமை மகேசனை மதிமயங்கச் செய்தது. கண் திரையில் பார்வதியின் அழகிய ரூபம் சிற்பமென தோன்றியது. பார்வதி இத்தனை அழகா என நினைத்தார் சிவன். மன்மதக்கணை காமத்தை ஊட்டியது. உடலைச் சிலிர்த்து திரும்பினார்.

தவம் கலைந்த சிவன் தன்னை திசை திருப்பிய மன்மதனை கோபத்தால் நெற்றிக் கண்ணால் சுட்டெரித்தார். அருகிலிருந்த பார்வதி மயக்கமானாள். கணவனின் நிலைக் கண்ட ரதி அழுது புலம்பி வேண்ட ரதியே யாம் பார்வதியை மணக்கும்போது உன் கணவன் மன்மதன் உயிர்பெற்று எழுவான். அனங்கனாக- அங்கமில்லாதவனாக இருப்பான், உன் கண்களுக்கு மட்டும் தெரிவான். மேலும் துவாபரயுகத்தில் மன்மதன் ஸ்ரீகிருஷ்ணன்-ருக்குமணிக்கு பிரத்தியும்னன் என்ற பெயரில் மகனாக தோன்றும் போது அவனுக்கு உருவம் உண்டாகும். பிரத்தியும்னனை சம்பரன் என்ற அசுரன் கவர்ந்து செல்ல பிரதியும்னன் யுத்தத்தில் சம்பாசுரனை அழிக்க சம்பாசுரனின் மகளான மாயாவதியாகிய உனக்கும், பிரத்தியும்னனுக்கும் திருமணம் நடைபெறும் என அருளினார். மன்மதன் சாம்பலானதை அறிந்த தேவர்கள் வருந்தினர். சிவன் அந்தர் தியானமானார். விபரம் அறிந்த இமவான் தன் மகள் பார்வதியை தன் இருப்பிடத்திற்கு அழைத்துப் போனான்.

மகட்கொடை!

சிவனின் தவச்சாலையிலிருந்து வந்த பார்வதி தன் தவத்தை மீண்டும் தொடங்கினாள். ஒர் நன்னாளில் முதிய அந்தணர் வேடம்கொண்டு பார்வதியின் தவச்சாலைக்கு வந்த ஈசன் பார்வதியின் மனதைச் சோதிக்க எண்ணி ‘’சிவனார்க்கு தோலாடை, எருது வாகனம், பாம்பு ஆபரணம், தலை மாலையோ எழும்பு, பன்றிக்கொம்பு இவைகள் மட்டுமல்லாமல் உண்ணும் பாத்திரம் தலைஓடு, உணவோ பிட்சையும் விஷமும், ஆடுகின்ற இடமோ சுடுகாடு, போட்டுக்கொள்வதோ வெள்ளெருக்கு, அறுகு, கொன்றை, நொச்சி, ஊமத்தம்பூ மாலை, தலையில் கங்கை, கழுத்தில் பாம்பு, கையில் மான், மழு, சூலம், உடுக்கு, அக்னி என்று இருப்பவன். பூதங்கள் சூழ இருப்பவன். இன்னும் சொல்லப்போனால் தாயுமில்லை, தந்தையுமில்லை, உற்றார் உறவுமில்லை, குலம், குணம் எதையும் சொல்ல முடியாது. அநாதியானவன். மன்னன் மகளான நீ இவனை மறந்து என்னை மணந்துகொள் என்று தன்னைப்பற்றி தாமே சுயவிமர்சனம் செய்தார். சிவசிவ என காதுகளைப் பொத்திக்கொண்ட அழுத பார்வதிக்கு காட்சிதந்து விரைவில் உன்னை மணமுடிக்க வருவோம் என்று அருளினார்.

சிவன் சப்த ரிஷிகளை நினைக்கத் தோன்றிய அவர்களிடம் இமவானின் வீட்டிற்குப்போய் பெண்கேட்க அனுப்பிவைத்தார். இப்படி மணமகள் வீட்டிற்குப் போய் பெண் கேட்பதை மகட்கொடை என்று இலக்கியங்கள் பகர்கின்றன.

சப்த ரிஷிகளை வரவேற்ற இமவான் தன் சம்மதத்தை சந்தோஷத்துடன் தர மலையரையனிடம் சொன்னார்கள். மலையரையன்-சிவன் தேவர்கள், முனிவர்கள், தபஸ்விகள் எல்லோருக்கும் திருமணத் தகவல் அனுப்ப ஏற்பாடு செய்தார். பங்குனி உத்திர நன்னாளில் மணம் முடிக்க இமயமலைக்கு எழுந்தருளினார்.

இந்த திருமணத்தைக் காண அனைத்து புவனங்களிலிருந்தும் அனைவரும் அங்கு குழுமி விட்டதால் வடபாகம் தாழ தென்பாகம் உயர்ந்தது. சிவன் நந்தியிடம் அகத்திய மாமுனியை அழைத்துவரச் சொன்னார். அகத்தியரிடம் தென்நாடு சென்று இந்த தாழ்நிலையைச் சமன்செய்ய பொதிகைமலை மீது இருக்கக் கடவது என ஆணையிட்டார்.

அகத்தியர் அடியேன் இழைத்த குற்றம் என்ன! தங்களின் திருமணக் காட்சியைக் காணாமல் நான் எவ்வாறு இவ்விடம் விட்டு செல்வது என்றார். நீ சற்றும் சிந்தியாமல் பொதியமலைக்குச் எல் யாம் அங்கு எமது திருமணக் காட்சியை உமக்கு காட்சி அருளுவோம் என்றார். சிவனை வணங்கி அகத்தியர் பொதியமலை செல்ல தென்பால் நிலம் வடதிசை இரண்டும் சமன் பட்டு நின்றது. ரதிதேவி மன்மதனை அனங்கனாக உருவத்துடன் பார்த்தாள். மற்றவர்களுக்கு அருவமாக இருந்து தன் தொழிலை தொடர்ந்து செய்தான். அனங்கனாக உயிர்பெற்ற மன்மதன் வணங்கிய தலம் குத்தாலம்- மன்மதீஸ்வரர். சிவ-பார்வதி கயிலையை அடைந்தனர்.

கயிலையில் நந்தியம்பெருமான் அனுமதியுடன் பிரம்மா மற்றும் முனிவர்கள் தேவர்களது நிலையையும் அசுரர்களது அட்டகாசத்தையும் சிவபெருமானிடம் எடுத்துக் கூறினார்கள். முன்பு கூறிய வீரமகனை உருவாக்கும் நேரம் வந்ததை உணர்ந்தார் சிவன்.

உரிய காலத்தில் பரமேஸ்வர தேஜஸாக சனத்குமாரர் ஜனிப்பது என்றானதும் பார்வதிதேவிக்கு புத்திரனாகப் பிறக்காவிட்டாலும் ஈஸ்வர தேஜஸை நீர்நிலையாக மாறிய பார்வதியின் சரீரத்தில் தாங்கி சுப்பிரமண்ய செரூபமாகத் தருவது என முடிவானது.

சிவன் அம்ச ஆறுமுக முருகன்!

சிவனின் ஈசானம், தத்புருஷம், அகோரம், வாமதேவம், சத்யோஜாதம் என்ற ஐந்துடன் ஞானிகள் பார்க்கும் ஞானமுகம் அதோமுகம் ஆகியவற்றிலிருந்து யாரும் அனுக முடியாத வெம்மையுடன் நெருப்பு பொறி தோன்றி ஞானம், வீரம், செல்வம், சித்தி, கருணை, இரக்கம் ஆகிய ஆறு பொறிகளாக சனத் குமாரர் தேஜஸாக ஜனித்து வெளிப்பட அக்னி பகவான் வாயுபகவான் இருவரும் அந்த தேஜஸை தாங்கும் சக்தியை இறைவனிடம் பெற்று தேஜஸை முதலில் கங்கையிலும் பின்னர் அன்னை நீர்நிலையாக இருந்த சரவணப் பொய்கையிலும் சேர்த்தனர். சிவன் அன்னை பார்வதியின் அம்சமான கார்த்திகைப் பெண்களை அழைத்து ஆறுவரையும் வளர்க்கச் சொன்னார். கார்த்திகைப் பெண்களால் வளர்க்கப் பட்டதால் கார்த்திகேயன்.

சிவசக்தி ஐக்கிய நாள்! ஆறுமுகன் பிறந்தநாள்! தைப்பூச நன்னாள்!

அம்மையும் அப்பனும் ஆறு உருவங்களாக சரவணப் பொய்கையில் விளையாடிக் கொண்டிருந்த குழைந்தைகளைக் கண்டு மனம் மகிழ்ந்து அவர்கள் அறுவரையும் அணைக்க ஆறுமுகமும் ஓர் உடலுமாக ஆறுமுகப்பெருமானக மாறினார். இது சிவசக்தி ஐக்கிய நாளாகும். ஆறுமுகனின் பிறந்தநாள்- தைப்பூச நன்னாள். ஆறுமுகனின் அவதார நிகழ்வு இது. உமையும் நீர் நிலையிலிருந்து உருமாறி தன் திவ்விய சரீரம் கொண்டாள்-பழநி.

நவசக்தி-நவவீரர்கள்! சிவபெருமானின் முகங்களிலிருந்து யாரும் அனுக முடியாத வெப்பத்துடன் தேஜஸ் வெளிப்பட்டபோது அதை தாங்காமல் அருகிலிருந்த பார்வதிதேவியும் பதட்டம் கொண்டபோது பார்வதி காலிலிருந்த சிலம்புகளின் நவரத்தினங்கள் சிதறின. அதை அரனார் நோக்க அம்பிகையின் திருவுருவம் ஒன்பது வடிவங்களாய் ஒன்பது சக்திகளாய் தோன்றின. பரமனாரின் தீட்சப்பார்வையால் ஒன்பதுபேரும் கர்ப்ப முற்றனர், கோபம் கொண்ட சக்தி அவர்களை இக்கர்ப்பத்துடன் பலகாலம் இருக்க சாபமிட்டார்.

நவசக்திகள் இந்த சாபத்தைக் கேட்டு அஞ்சி நடுங்க அவர்கள் வியர்வைத் துளிகளிலிருந்து லட்சம் வீரர்கள் தோன்றினர். மைந்தர்களே நீங்கள் அனைவரும் அவுணர்களை அழிக்க முருகனுக்கு உதவியாய் இருங்கள் என்று சிவன் அருள் புரிந்தார். நவசக்திகளும் பலகாலம் கர்ப அவதியுடன் தவம் செய்து வந்தனர். கர்ப்பம் உள்ளேயிருந்த வண்ணம் சிவயோகம் செய்து வளர்ந்தன. கர்ப்பம் வளர வளர தாங்கமுடியாத நவசக்திகள் பார்வதி பரமேஸ்வரனைப் பர்த்து தங்கள் குறைநீக்க வேண்ட அறிவிலும் ஆற்றலிலும் சிறந்த புதல்வர்களைப் பெற அருள்.

நவசக்திகளான
மாணிக்கவல்லிக்கு-தீரமிக்க வீரவாகுத்தேவர்,
முத்துவல்லி-மௌத்திகவல்லிக்கு வீரகேசரி,
புஷ்பராகவல்லிக்கு வீரமகேந்திரர்,
கோமேதகவல்லிக்கு வீரமகேசுவரர்,
வைடூர்யவல்லிக்கு வீரபுரந்தார்,
வைரவல்லிக்கு வீரராக்கர்,
மரகதவல்லிக்கு வீரமார்த்தாண்டர்
பவளவல்லிக்கு வீராந்தகர்,
இந்திர நீலவல்லிக்கு வீரதீரர் என மகவாக அவதாரம் செய்தனர். இவர்கள் அனைவருக்கும் தனித்தனியே வாள் கொடுத்து லட்சம் வீரர்களுடன் நீங்களும் கூடி ஆறுமுகனுக்கு உதவி புரிவீர் என ஈசன் அருள்.

கிரௌஞ்சமலை- தாருகன்!

முருகன் படையுடன் வருவதை தூதர்கள் மூலம் அறிந்த தாருகன் தன் படையுடன் எதிர்க்க வீரபாகுத்தேவர் முதலில் போரிட, அவரிடம் தோற்றதுபோல் ஓடிய தாருகனைத் தொடர்ந்து சென்ற வீரபாகுத்தேவரும் அவரைத் தொடர்ந்த வீரர்களும் கிரௌஞ்ச மலையின் மாயையில் சிக்கினார். இதை அறிந்த சிவக்குமரன் தானே நேரில் போரிடச் சென்றார். சிறிது போரிட்ட பின் மனதில் அச்சம் கொண்டு கிரௌஞ்ச மலையில் ஒளிந்தான் தாருகன். முருகன் தன் வேலாயுதத்தைப் பிரயோகித்து கிரௌஞ்சமலையின் மாயைகளை அழித்து வீரபாகுத் தேவர் மற்றும் உள்ள வீரர்களை மீட்டுத் தாருகனை அழித்தார். போரில் தாருகன் செலுத்திய சிவப்படை.-பசுபதி அஸ்திரத்தை கையில் வாங்கிய குமரன் அதை வீரபாகுத்தேவரிடம் அளித்தார். தேவர்கள் விருப்பப்படி கிரௌஞ்ச மலைமீது தானும் தனது தம்பியரும் தங்க ஓர் நகரை உருவாக்க தேவதச்சனிடம் சொல்லி அங்கு எழுந்தருளினார். கிரௌஞ்சமலை-கர்நாடகா-சந்தூர்- 10கி.மீ.(பெல்லாரி மாவட்டம்)

கிரௌஞ்சமலை தேவாசுரப் போரில் தாருகன் இறந்து பட்டதை அவன் மகன் அசுரேந்திரன் வீரமகேந்திரபுரியைத் தலை நகராக கொண்டு ஆண்டு வந்த தன் பெரியப்பா சூரபதுமனிடம் கண்ணீர் மல்க கூறினான். பின்னர் நடந்த போரில் சூரபதுமன் மகன் பானுகோபன் இறக்க, சூரபதுமனின் கடைசி தம்பி சிங்கமுகனும் கொல்லப்பட சூரபதுமன் தானே நேரில் வந்து போர் புரிய குமரனின் வேல்படை. தவம் செய்து 1008 அண்டங்களையும் 108 சதுர்யுகங்களுக்கு அரசாள வரம் பெற்ற சூரபதுமனுடன் போரிட்டு தேவர்களையும் ரிஷிகளையும் மீட்டார். போரில் காயமடைந்தவர்களுக்கு சிவபெருமான் வைத்தியராக பார்வதி தேவியுடன் வந்து தேவையான மருந்துகளை மலைபோல் குவித்து அதன்மீதமர்ந்து உதவி செய்தனர்.-பரளி (ஒளரங்காபாத்) –வைத்தியநாதர்-ஜோ.தலம்-5/12

108 யுகங்கள் அரசாண்ட சூரபதுமனை இறுகூறாக்கி பிளக்க சிவனிடம் பெற்ற வரத்தால் உயிர்பெற்று தான் உருவாக்கிய வீரமகேந்திரபுரம் அழிந்து தன் ஆணவம் அழிந்துபட குமரனை வழிபட்டு நிற்க இருகூறான அவனின் ஒரு கூறை சேவல் கொடியாகவும் மற்றதை மயிலாகவும் குமரன் ஏற்றார். சூரபதுமனின் மகன் இரண்யன் தந்தை இறந்ததைக்கண்டு புத்திரர்கள் செய்யும் கடமைதனை செய்யமுடியாமல் சேவலும் மயிலுமாய் ஆனாய் என புலம்பி நின்றான். முருகப்பெருமான் தனது தம்பியருடன் தங்க ஓர் நகரை உருவாக்க தேவதச்சனிடம் சொல்லி அங்கு எழுந்தருளினார்-திருச்செந்தூர். சனத்குமாரர் கண்ட கனவின்படி முருகன் தேவர்களின் படைக்கு சேனாதிபதியாகி தேவாசுரப் போரில் அசுரர்களை சம்ஹாரம் செய்தார்.

சூரசம்ஹாரத்தின் தத்துவம்!

ஒவ்வொரு உயிருக்கும் மும்மலங்கள் இருக்கின்றன. அந்த ஆத்மாவை அழிக்க அவையே போதுமானவை. மாயாமலமான தாரகாசூரன் உலகமே உண்மை என நம்பி வாழ்ந்து பின்னர் அது பொய் என்றுணர்ந்து அழிகின்றான். சிங்காமுகாசூரன் கன்ம மலம். ஆணவத்தின் அடையாளமான சூரபத்மன் இறக்கும் தருவாயில் அதை உணர்கின்றான். அம்மூன்று மலங்களையும் ஞானவேல் அறுத்து பந்தத்திலிருந்து விடுவிக்கின்றது.

எல்லா அறிவும் சக்தியும் பெற்ற மூன்று அசுரர்களும் இறைவனின் வலிமையை உணராமல் தான் என்ற அகந்தையால் அழிந்தார்கள். சரணடைந்த சூரபத்மனை தன்னோடு வைத்துக்கொள்கின்றார் முருகப் பெருமான். இறைவனிடமிருந்து வந்த நாம் மலங்களை ஒழித்து மீண்டும் இறைவனிடம் சேரவேண்டும் என்பதே சூரசம்ஹாரத்தின் தத்துவம்.

சஷ்டிதேவி-தேவயானையை திருமணம்!

தேவர்களைக் காக்க சூரபதுமனுடன் நடந்த போரில் அவருக்குத் துனையாக இந்திரனின் மகளான சஷ்டி தேவியும் போரிட்டு போர் வெற்றிகரமாக முடிந்ததும் முருகனுக்கு சஷ்டிதேவி-தேவயானையை மணம் முடிக்க இந்திரன் விரும்பி ஏற்பாடுகள் ஆரம்பித்து நிச்சயிக்கப்பட்டது.

ஆசை, அகந்தை, பொறாமை, சினம் இல்லமலிருக்க முசுமுகம்!

திருக்கயிலையில் சிவனும் பார்வதியும் ஏகாந்தமாய் இருக்கையில் அம்மரத்தில் பல முசுக்கள்-குரங்குகள் அமர்ந்திருந்தன. ஓர் ஆண்முசு மரத்திலிருந்த வில்வ இலைகளைப் பறித்து கீழே போட அந்த இலைகள் மரத்தின் கீழே இருந்த சிவ பார்வதிமேல் விழுந்து கொண்டே இருக்க கோபம் கொண்ட பார்வதியிடம் வில்வ இலைகளால் முசு நம்மை அர்ச்சிக்கின்றது, எனவே கோபம் வேண்டாம் என்றார். அப்போது அம்முசுவிற்கு ஞானம் உண்டாகி தன் தவறுக்காக வருந்தி சிவ பார்வதியை வணங்கி நிற்க, சிவன் முசுவிடம் நீ உன்னை அறியாமல் என்னை வில்வத்தால் பூசித்தாய் அதன் பயனாக அடுத்த பிறப்பில் நீ உலகம் முழுவதையும் ஆட்சி செய்யும் பேறு கிட்டும் என்றார்.

இதைக் கேட்டு மகிழ்ச்சியடையாத முசு, எனக்கு அரச பதவி வேண்டாம் நான் எப்போதும் தங்களையே தொழுது கொண்டிருக்க அருள் புரிய வேண்டியது.. முசுவே நீ மண்ணுலகை ஆண்டபின் இங்கு என்னிடம் வந்துவிடுவாய் என்றார். இதில் விருப்பமில்லாத முசு, பெருமானே மண்ணுலக வாழ்வில் எனக்கு நாட்டமில்லை. இருப்பினும் தங்களின் ஆணைக்கு அடிபணிகின்றேன். உலகில் அரசாட்சி செய்யும் போது எனக்கு மானிட உரு கிடைத்தாலும் என் முகம் முசுவின் முகமாகவே இருக்க வேண்டியது. ஏனெனில் அப்போதுதான் ஆசை, அகந்தை, பொறாமை, சினம், போன்ற குணங்கள் என்னை தீண்டாமல் இருக்கும் என வேண்ட, அதன்படி அரிச்சந்திரன் வம்சத்தில் முசுவின் முகத்துடன் முசுகுந்தன் என்ற பெயருடன் கருவூரை அரசாண்டு வந்தான்.

மன்னுலக மன்னனுக்கு தேவர்கள் வீட்டு திருமண அழைப்பு!

சூரன் மாண்டான் என்பதால் மகிழ்வுற்ற முசுகுந்தன் முருகப் பெருமானின் திருமணத்தைக் காண தன் புடைசூழ வந்திருந்து இந்திரன் முதாலானோர்களைச் சந்தித்து மகிழ்ந்தான்.

திருமணம் பங்குனி உத்திர நாளில் திருப்பரங்குன்றத்தில் இனிது நடந்தது, சஷ்டிதேவி தெய்வானையாக மாறினாள்.

வள்ளி திருமணம்!

சில காலம் கழித்து முருகன் திருத்தணிகை மலைக்கு வந்தார். அங்கு அவரைச் சந்தித்த நாரதர் முன்னைப் பிறவியில் திருமாலின் மகளான சுந்தரவல்லி இங்கு வள்ளியாக இருப்பதும் அவரை தாங்கள் உரிய காலத்தில் மணம் புரிய வேண்டும் என்றார். முருகப்பெருமான் வள்ளிக்கும் நம்பிக்கும் தன் உருவைக்காட்டிட அனைவரும் மகிழ்ந்தனர். விரைவில் திருமணம் இனிது நடந்தது தேவ தச்சனை அழைத்து கோவில் அமைக்கச் சொன்னார்..-திருத்தணி. பின்னர் அங்கு தெய்வானை வர வள்ளியும் அவரும் முற்பிறவியில் திருமாலின் மகள்கள் சகோதரிகள் என்பதை உணர்தினார்.

சிவகுமரனின் பெயர்கள்!

நெற்றிக்கண்களிலிருந்து தீப்பொறிகளை கங்கை சுமந்து சென்றதால் காங்கேயன்.
சரவணப் பொய்கையில் தோன்றியதால் சரவணபவன்
கார்த்திகைப் பெண்கள் வளர்த்ததால் கார்த்திகேயன்
அறுவரையும் ஒன்றாக செய்ததால் கந்தன்
அழகின் உருவம் முருகன்
மயிலில் சஞ்சரிப்பதால் விசாகன்
முருகனுக்கு ஆறு முகமாதலால் ஆறுமுகன், சண்முகன் (ஷண்-ஆறு)
குரு திருமுருகனின் அருட்பார்வை தன்மீது விழ தவம் செய்து பூஜை குருபரன்

பிரணவ ஸ்வரூபியான சிவனே முருகனாக விளங்குகின்றார். முருகனும் சிவனும் ஒன்றேயாதலால் அ கார, உ கார, ம கார மாகிய ஓம் காரத்தின் ஸ்வரூபம் சுப்ரமண்யர். ஒவ்வொரு மந்திரத்திற்கும் உயிராகத் திகழ்வது ஓம். அந்த ஓம் காரத்தினன் ஜீவராசிகளின் இதயக் குகையில் அமர்வதாலே குகன் எனப்பெயர். அனைத்திலும் பரவியிருப்பதாலும், எந்தப் பூஜைக்கும் முதல் அங்கமான ஆத்ம பூஜை செய்தபிறகே என்பதனாலும் அப்போது இதயகுகையில் அமர்ந்திருப்பதாலும் குகபரமன் என்றாகிறது. ஞானத்தின் வடிவாக திகழ்பவன். எங்கும் நிறைந்த அழகுப் பொருளே முருகன் என்று அறிவு கூறினாலும் வடிவத்தை நினைந்து நினைந்து பழகிய நெஞ்சில் அந்த உருவம் மங்குவதில்லை.

அகத்தியர் தன் சீடன் இடும்பனிடம் தான் வணங்குவதற்காக இமயமலைச் சாரலிலிருக்கும் சிவகிரி, சக்திகிரி என்ற இருமலைகளையும் கொண்டுவரச் சொன்னார். அம்மலைகளை ஒரு நீண்ட கழியில் இருபுறமும் கட்டி காவடியாக தோளில் தூக்கி வரும்போது ஒர் இடத்தில் களைப்பு மேலிட காவடியை கீழே வைத்துவிட்டு சற்று ஓய்வெடுத்தான். பின் காவடியைத் தூக்க முயற்சிக்கும்போது அம்மலைமேல் இருந்த சிறுவன் அம்மலை தனக்குச் சொந்தம் எனக்கூற இருவரும் போரிட்டனர். முடிவில் சிறுவனாக வந்திருப்பது சிவக்குமரன் என்றறிந்து இடும்பன் வணங்க அருளினார் முருகப்பெருமான். இந்நிகழ்வு நடந்த தினம் ஒர் தைப்பூச நன்னாள். இடும்பனுக்கு படைத்தளபதிகளில் ஒருவன் என்று பதவி வழங்கி அருள். அன்றிலிருந்து முருகனுக்கு காவடி எடுக்கும் பழக்கம் ஏற்பட்டது. காவடிகள்- பால்காவடி, பன்னீர்காவடி, புஷ்பக்காவடி, மயில்காவடி, அக்னிகாவடி, பறவைக்காவடி, மச்சக்காவடி, சர்ப்பக்காவடி என பலவிதமுண்டு.

ஒருவனுக்கு வரும் பிரச்சனைகள், சங்கடங்கள் எல்லாவற்றையும் தொடர்ந்து சுமந்தால் மனதில் அழுத்தம் அதிகமாகும். மூளையின் செயல் குன்றும். எனவே பிரச்சனைகள் தோன்றியவுடன் அதை ஓரமாக ஒதுக்கி வைக்கப் பழகவேண்டும். இதைத்தான் முருகனுக்கு விரதம் இருந்து காவடி எடுக்கும் பக்தர்கள், முருகா இத்தனை நாட்கள் விரதம் இருந்து காவடி சுமந்து வந்தேன் உன் அருளால் எல்லாம் நல்லபடியாக நடந்தது. காவடி இறக்கி வைத்தது போன்றே என்மனதில் உள்ள சுமைகளை இறக்கி வைத்து அருள்வாய் எனச் சொல்லாமல் சொல்லும் செயலாகும்.

முருகனுக்கு உகந்த நாட்கள்- ஐப்பசிமாத சஷ்டி- அவதார நோக்கமாகிய சூர சம்ஹாரம் நிறைவேறிய நாள். கார்த்திகைமாத திருக்கார்த்திகை- ஆறுமுகனை வளர்த்த அன்னையரைச் சிறப்பிக்கும் நாள். தைமாத தைபூசம்- குருபகவான் தன் ஜென்ம நட்சத்திரமான பூசம் சந்திரனோடு சேரும் நாள்-பௌர்ணமி அன்று தவம் செய்து பூஜித்து திருமுருகனின் அருட்பார்வை தன்மீது விழ வழிபாடு செய்தார். அன்று அருள் அலைகள் அதிகம் இருக்கும் நாள். சரணடைந்த பக்தர்கள் விரதம் இருந்து வழிபட சிறந்தது. அசுரனை அழிக்க அன்னையிடம் வேல்வாங்கிய நாள். இடும்பனுக்கு அருள் புரிந்த நாள்.

குருநாதர் ஏன்!

சிவனைத் தரிசிக்க தேவர்களுடன் வந்த பிரம்மன் அங்கிருந்த குமரப்பெருமானை அனைவரும் வணங்க தான் மட்டும் இவர் இளைஞன்தானே என்று செருக்கடைந்து வணங்காமல் சிவனை தரிசிக்கச் சென்றார். சிவனைத் தரிசித்து செல்லும் பிரம்மனுக்கும் மணியும் ஒளியும்போல், மலரும் மணமும் போல் தாமும் சிவமும் பிரிக்க முடியாத நிலையாமை என்பதை உலகிற்கும் உணர்த்தவும் பிரம்மனின் செருக்கை அடக்கவும் விரும்பிய முருகன் பிரம்மனை அழைத்து நீவிர் செய்யும் தொழில் யாது என்றார்.. படைக்கும் தொழில் என்பவரிடம் வேதங்கள் தெரியுமா உங்களுக்கு என்று கேட்க, ரிக் வேதம் பற்றி பிரம்மன் ஓம் என்று கூற ஆரம்பித்தார். ஓம் என்பதன் பொருள் என்ன வென்று கேட்க தடுமாறிய பிரமனை இது அறியாமல் படைப்புத் தொழிலை செய்வது சரியாகாது எனக்கூறி பிரமனைச் சிறையெடுத்தார். அவர் செய்துவந்த படைப்புத் தொழிலை தாமே மேற்கொண்டார்.

திருமால் பிரமனை விடுவிக்க எண்ணம் கொண்டு தேவர்களை அழைத்துக் கொண்டு சிவபெருமானிடம் சென்று முறையிட, புன்னகைப் பூத்த சிவபெருமான் பிரம்மனின் செருக்கை அடக்கவே அவனை சிறையிலடைத்துள்ளான் என்றவர் நந்தியெம்பெருமானை அழைத்து முருகனிடம் சென்று பிரமனை விடுவிக்க சொன்னார். நந்தியின் பேச்சை கேளாதாதால் எம்பெருமான் அனைவருடனும் முருகனைக் காணப் புறப்பட்டார்.

ஓம் எனும் ஓங்கார முதல் எழுத்தின் பொருள் தெரியாமல் படைக்கும் செயலை செய்தல் சரியன்று. இருப்பினும் உங்களது திருவுள்ளப்படி அவனை விடுவிக்கின்றேன் என பிரமனை விடுவித்தார். பெருமான் பிரமனை மீண்டும் தனது படைப்புத் தொழிலைச் செய்ய அனுமதித்தார்.

பெருமான் குமரனை நோக்கி ‘பிரணவத்தின் பொருள் உனக்கு வருமாயின் சொல்லுக‘ என்றார். அப்போது அன்னைக்கு பிறர் அறியாவண்ணம் நீவிர் உபதேசித்த பிரணவத்தின் பொருளை யான் யாவரும் கேட்கும்படி சொல்வது முறையில்லை. இருப்பினும் காலம், இடம், அறிந்து முறைப்படி(குரு-சிஷ்ய பாவனையில்) கேட்கின் யான் கூறுவோம் என்றார்.

தன் குமரனிடம் திருவிளையாடல் புரிய நடந்த இந்த நிகழ்விற்காக, ஞானத்தின் பிறப்பிடம் ஓங்காரத்தின் சொரூபமான பெருமான் மைந்தா, நன்கு உரைத்தாய் என்று இருக்கையில் இருந்து எழுந்து, சிரந்தாழ்த்தி, வாய் பொத்தி, செவி சாய்த்து நின்றார்.. கல்லால மரத்தின் அடியில் எழுந்தருளி நால்வருக்கும் ஞான உபதேசம் செய்த ஞானகுரு, சீடனாகி குருவிடம் பாடம் கேட்கும் நிலையில் இருந்தார். குமரன் தன் மழலை மொழியில் பிரணவ மந்திரத்தின் பொருளை மிகத் தெளிவாகக் கூறினார்-.சுவாமிமலை சுவாமிநாதன்.

இந்த நிகழ்வு ஏன் என்றால் எத்தகைய வாழ்வும் ஞானமும் பெற்றவர்கள் ஆனாலும் ஒன்றை கற்கும்போது குருநாதர் வேண்டும் என்பதை உலகிற்கு உணர்த்த திருவருள் புரிந்தார்

மாலின் கண்ணீரில் இரு பெண்கள்!

இந்த நிகழ்வைக் கண்ணுற்ற உமையின் தமையன் திருமாலின் கண்களிலிருந்து ஆனந்த நீர் துளிர்கள் துளிர்க்க அந்த இரு சொட்டு கண்ணீர் துளிகளும் இரு பெண்களாக அமிர்தவல்லி என்றும் சுந்தரவல்லி என்றும் மாறினர். இருவரும் என்றும் இளைமையுடன் இருக்கும் அழகு குமரனை மணந்து கொள்ள விரும்பி சரவணப் பொய்கையில் சடக்கர மந்திரத்தை ஜபித்து தவமிருந்தனர். அவர்கள் முன் தோன்றிய குமரன் மூத்தவள் அமிர்த வல்லியை நோக்கி நீ தேவலோகத்தில் இந்திரனின் மகளாகவும், சுந்தரவல்லியை பூலோகத்தில் சிவமுனியின் மகளாகப் பிறந்து வேடராஜனுக்கு மகளாகவும் வளர்ந்து வாருங்கள் உரிய காலத்தில் யாம் உங்களை திருமணம் புரிவோம் என்றருளினார்.

அமிர்தவல்லி சிறுமி வடிவம் எடுத்து மேருமலையில் இந்திரன்முன் சென்று நான் உன்னுடன் பிறந்த உபேந்திரனுடைய மகள் என்னை உன்னுடைய வளர்ப்பு மகளாக வளர்ப்பாயா என்றாள். இந்திரன் மகிழ்ந்து சஷ்டிதேவி-தேவசேனா எனப்பெயரிட்டு வளர்த்து வந்தான். அங்கு ஐராவதம் அவளை வளர்ப்பதில் ஆர்வம் காட்டியதால் தெய்வயானை எனவும் பெயர் பெற்றாள்

திருமால் சிவமுனிவராக தவம் செய்து கொண்டிருக்கும்போது மகாலட்சுமி மான் உருவில் வர திருமாலான சிவமுனி இச்சை கொண்ட பார்வையை வெளிப்படுத்த அம்மான் கருவுற்று உரிய காலத்தில் வள்ளிக்கிழங்கை அகழ்ந்து எடுக்கும் குழியில் குழந்தையை ஈன்று பின் மறைந்தது. அந்தப் பகுதிக்குச் சொந்தக்காரனாகிய நம்பி பெண் குழந்தை இல்லாததால் அக்குழந்தையைக் கண்டெடுத்து வள்ளி எனப்பெயரிட்டு வளர்த்து வந்தான்.

முருகன் அடைந்த சாபம்!
புகழ்ச்சிக்கு மயங்குவதும், தற்புகழ்ச்சியுடன் பேசுவதும் ஆபத்து!

ஒங்காரத்தின் பொருள் கேட்டு சொல்லாததால் பிரமனை சிறை செய்த முருகனை அதன் பொருள் சொல்லக் கேட்க பொருள் சொல்லிவிட்டு கடைசியில் சுப்ரமணி ஓம்! என்றார். சதாசிவ ஓம்! என்பதற்குப் பதில் சுப்ரமணி ஓம்! என்று முருகன் சொன்னதைக் கேட்டு தேவர்களும் முனிவர்களும் அதிர்ந்தனர். புகழ்ச்சிக்கு மயங்குவதும், தற்புகழ்ச்சியுடன் பேசுவதும் ஆபத்து. இது தவறு என தன் குமரினிடம் கூறிய சிவன் சர்ப்பமாக மாறச் சபித்தார். ஸ்ரீபிரம்மாவை சிறையிலிருந்து மீட்டார். சர்ப்பமான முருகன் பல தலங்கள் சென்று வழிபட்டு திட்டை வந்தார். பல வருடங்கள் பூஜை செய்து வழிபட்டு அருள் பெற்று தன் பழைய உருவை அடைந்தார்.. ஸ்ரீசுப்ரமணியராகவும், அருவமாக சர்ப்ப வடிவிலும் முருகன் அருள். தென்குடித்திட்டை.தி.த-132.வசிஷ்டேஸ்வரர்(சு)


தந்தைக்கு உபதேசம் செய்தது சரியா!

சின் முத்திரையுடன் தியான நிலையில் தண்டபாணி. தந்தைக்கு பிரணவ உபதேசம் செய்ததை எண்ணி முருகன் வருந்த சிவலிங்கத் திருமேனியை வழிபடச் சொல்லி மாமன் பெருமாள் அறிவுறை. வாய்மூடி மௌனியாய் தன் பேச்சுத்தன்மையைக் குறைத்து பலதலங்கள் சென்று வழிபட்டார் சுப்ரமண்யர். சிவானந்தேஸ்வரை வழிபட்டு தன் பேச்சாற்றலைப் பெற்றார். திக்குவாய்க்காரர்கள் தண்டாயுதபாணிக்கு நாற்பத்தைந்து நாள் தேன் அபிஷேகம் செய்து வழிபாடு.

சிவகாமசுந்தரியின் மகன் குமரகுருபரன். குமரகுருபரன் ஐந்து வயது வரை ஊமை. பேச்சாற்றலில்லை. கவிராயர் குழந்தையுடன் இங்கு வந்து உப்பில்லா விரதம் இருந்து தவறு செய்திருந்தால் தண்டணையைத் தங்களுக்குத் தந்திடவும் குழந்தையை பேசவைக்கவும் வேண்டுதல். சரவணப எனத் தொடங்கும் கந்தர் கலிவெண்பாவை குழந்தை வாய்திறந்து பாடியது. பிச்சாடனர் சிறப்பு. வழக்கத்திற்கு மாறாக சந்திரசேகரர் லிங்கோத்பவர் இடத்தில். முருகனுக்கு அருளி சிவானந்தேஸ்வரர் என்ற நாமத்தில்.-திருப்பேணுபெருந்துறை-நாச்சியார்கோவில் அருகில்

வேத உட்பொருளை கவனியாதலால் சிவன் உமையை சபிக்க கோபம் கொண்ட முருகன் வேதாகமங்களை கடலில் வீச பாவம் சூழ்ந்து உருத்திரசன்மராக -ஊமையாய் பிறந்து சாபம் நீங்கிய தலம்- எருக்கத்தம்புலியூர்.

சோமாஸ்கந்த தத்துவம்!

சிவபெருமான் ஓங்கி உயர்ந்து வளர்ந்த தாணு மரமாக நிற்க, அம்பிகை பார்வதி அந்த மரத்தில் பற்றிப் படர்ந்த கொடியாக- அபர்ணாவாக பிணைந்திருக்க அந்த மரத்தின் கீழ் சிறிய கன்றுச் செடியாக முருகன் தோன்ற அதுவே முதல் முதலாக அமைந்த சோமாஸ்கந்த வடிவம் என்கிறது ‘சோமாஸ்கந்த தத்துவ நூல். வைகாசி விசாக நாளில்தான் தாணு அபர்ணா விசாக அவதாரம் நிகழ்ந்துள்ளது.

ஞானவேல்!

ஒவ்வொரு உயிருக்கும் மும்மலங்கள் இருக்கின்றன. அந்த ஆத்மாவை அழிக்க அவையே போதுமானவை. எனவே அவைகளை அழித்து ஒழிக்க வேண்டும் என்ற தத்துவத்தை நமக்கு உணர்த்தவே முருகனின் ஞானவேலால் ஆணவமலம்- சூரபத்மன், கன்மமலம்-சிங்கமுகன், மாயாமலம்-தாரகன் ஆகியோரை வதம் செய்வதன் மூலம் அம்மூன்று மலங்களையும் ஞானவேல் அறுத்து பந்தத்திலிருந்து விடுவிக்கின்றது என்பதை நமக்கு உணர்த்துகின்றது.

அம்மன் அம்ச நான்முக முருகன்! தோற்றம்!

விஸ்வாமித்திரர் பிரம்மரிஷி பட்டம் வேண்டி தவம் இருக்க ஈசன் தோன்றி பாலதிரிபுரசுந்தரியை நோக்கித் தவம் செய்யச் சொன்னார். குழந்தையாய் வந்த சுந்தரிக்கு திலகமிட அவர் குளத்தில் குணிந்து திலகத்தைப் பார்க்க அதிலிருந்த குங்குமம் குளத்தில் விழ ஒன்றின்பின் ஒன்றாக நான்கு முகங்கள் தோன்றி திரிபுரசுந்தரியை வணங்க நான்முக முருகா வருக எனக்கூறி அணைத்துக் கொண்டாள். விஸ்வாமித்திரா! ஈசன் அன்று என் அம்சம் இன்றி ஆறுமுக வேலனை படைத்தார். இன்று அவரது அம்சமின்றி நான்முக வேலனை உனக்காக படைத்தேன். இவனே உனக்கு வேண்டியது தருவான் என்றாள். தூரத்தில் கல் மழை பெய்த இடத்திற்கு வரச்சொல்ல அங்கு ஒர் கோவிலில் பாலதிரிபுரசுந்தரியுடன் நான்முக முருகன் சேர்ந்து காட்சி. இறையருள் பெற தவம் செய்யாமல் வேறு எதையோ தேடிக்கொண்டிருந்தேனே என வருந்தினார் விஸ்வாமித்திரர். சதுர்முகமுருகன் சிறப்பு.சின்னாளப்பட்டி

சாமுத்திரிகா லட்சணம் யார் உருவாக்கியது!

கார்த்திகேயன் ஆண், பெண் லட்சணங்களை சீரமைத்துக் கொண்டிருக்கும்போது தம்மை மதிக்காமல் செய்கின்றாறே என்பதால் அவர் செயலுக்கு இடையூறு விளைவித்தார் விநாயகர். சினமுற்ற கார்த்திகேயன் கணேசரை வீழ்த்த எண்ணி அவரின் பல் ஒன்றை பிடுங்கி விட்டார். பரமசிவன் அங்கு வந்து பிள்ளைகளின் சச்சரவிற்கு காரணம் கேட்க. கார்த்திகேயன் தான் ஆண், பெண் லட்சணங்களை சீரமைக்கும் பணியில் இருக்க அதைக் கெடுத்துவிட்டார் என்றார், அப்போது ஆண், பெண் லட்சணங்கள் என்று கூறுகின்றாயே என்னிடம் எத்தகைய புருஷ லட்சணம் எனக்கேட்டார். கபாலி எனப் பெயர் பெற்ற தங்களிடம் எப்படி புருஷ லட்சணம் காணமுடியும் என்பதைக் கேட்ட சிவன் கோபமுற்று ஆண்களின் லட்சணங்கள் பற்றிய சுவடிகளைக் கடலில் தூக்கி எறிந்துவிட்டு அந்தர் தியானமானார்.

சமுத்திரராஜனை அழைத்து நீ பெண் லட்சணங்களைப் பற்றிப் பகுத்து ஆராய்ந்து உருவாக்கு. கார்த்திகேயன் சொன்ன புருஷ லட்சணங்கள் அப்படியே இருக்கட்டும் என்றார். அப்போது சமுத்திர ராஜன் இவை என்வசமிருந்து வருவதால் இவற்றிற்கு சாமுத்திரிகா லட்சணம் என்ற பெயரில் விளங்க அணுக்கிரகம் வேண்டினார்.

கார்த்திகேயன் முன் தோன்றி, தேவலோக நியதிப்படி யார் எந்த வேலையைத் துவக்கினாலும் கணேசரின் அனுமதியோடு துவக்கினால் தான் விக்னமின்றி நிறைவேறும். நீ சகோதரின் பல்லை திருப்பிக் கொடுத்துவிடு. உன் விருப்பப்படி லட்சண ஏடுகளை சமுத்ர ராஜனிடமிருந்து பெற்றுக்கொள். ஆனால் அது சமுத்ர ராஜன் விருப்பப்படி சாமுத்ரிகா சாஸ்திரம் என்றே அழைக்கப்படும். என்றார்.

கார்த்திகேயன் தான் அண்ணனின் பல்லைக் கொடுத்து விடுகின்றேன். ஆனால் அவர் அதைக் கையிலேயே வைத்திருக்க வேண்டும் கீழே கண்ட இடத்தில் வைத்தால் அந்த பஸ்பம் அவரை எரித்துவிடும் என்றார். என்வே சாமுத்ரிகா லட்சணம் என்ற சாமுத்ரிகா சாஸ்திரம் முருகனால் எழுதப்பட்டது.


கார்த்திகைப் பெண்கள் யார்!

சனகர், சனந்தர், சனாதனர், சனத்குமாரர் ஆகிய ரிஷிகள் நால்வரின் வேண்டுகோளுக்கிணங்கி சிவன் அஷ்டமா சித்திகளை அடையும் வழிகளைப் போதித்தார். அருகிலிருந்த ரிஷிபத்தினிகளான நிதர்த்தினி, அப்ரகேந்தி, மேகந்தி, வர்தயேந்தி, அம்பா, துலா ஆகிய அறுவரும் தங்களுக்கும் அஷ்டமா சித்திகளை உபதேசிக்க வேண்டினர். மனதில் பக்குவம் உள்ளவர்களுக்கு மட்டுமே உபதேசிக்க வேண்டும் என்பதால் சிவன் தயங்க பார்வதி அவர்களுக்காக வாதாட சிவன் அவர்களுக்கும் அஷ்டமா சித்திகளை உபதேசித்தார்.

உபதேசம் பெற்றவர்கள் தாங்கள் உமைக்கு இணையாக இருப்பதால் ஏன் உமைக்கு பணி புரிய வேண்டும் என நினைத்ததால் சிவன் அவர்களை கல்லாக மாற சாபம். உண்மை நிலை உணர்ந்த பெண்கள் வருந்தி அன்னையை மனதால் பூஜிக்க உமை மன்னிக்க சிவனும் மன்னித்தார். மீண்டும் பணிப் பெண்ணான அவர்கள் ஐயனே காரணமின்றி ஏதும் செய்யமாட்டீர்கள் என்ற ஞானம் எங்களுக்கு ஏற்பட்டுள்ளது. கல்லாகமாற்றி மீண்டும் பெண்ணாக மாற்றியதின் அர்த்தம் என்ன என்றனர்.

தீயவற்றை அழிக்கவும் தேவர்களுக்கு நல்வாழ்வு கொடுக்க சிவ அம்சத்தில் பிறக்கப் போகிறவனை வளர்க்கப் போகின்றீர்கள். மற்றவர்கள் செல்வம் வீடு எனக் கேட்க நீங்கள் ஞானத்தை கேட்டுள்ளீர்கள். ஆனால் அந்த ஞானத்தை முறையாக பயன்படுத்தும் பக்குவம் உங்களிடம் (கார்த்திகைப் பெண்கள்) இல்லை. அதை முறைப் படுத்தவே இந்த நிகழ்வு என்றார்.

கார்த்திகைப் பெண்கள்! கிருத்திகை நட்சத்திரம்! கார்த்திகேயன்!

குழந்தையாய் இருந்த முருகனை எடுத்து பாலூட்டி பாசம் காண்பித்த கார்த்திகைப் பெண்கள், முருகா! உன்னை வளர்த்த எங்களை உலகம் மறந்துவிட்டதே! என வருத்தப்பட, அன்னைக்குச் சமமாக என்னை சீராட்டி பாலுட்டிய நீங்கள் அனைவரும் ஒன்றாகி கிருத்திகை நட்சத்திரமாக வானில் சுடர் விடுவீர்கள். இந்த நாளான ஆடிக்கிருத்திகை இனி எனக்கு மிகவும் உகந்த நாள். இந்தநாளில் விரதமிருந்து வணங்கும் பக்தர்கள் துயர் தீர்ப்பேன். உங்கள் பெயரால் நான் கார்த்திகேயன் என்ற பெயரிட்டு அழைக்கப்படுவேன் என அருள் புரிந்தார். மேலும் கார்த்திகை மாதம் கார்த்திகை நட்சத்திரத்தின்போது மக்கள் தீபமேற்றி வழிபடுவர் என அருள்.

முருகனின் அறுபடை வீடு!

முருகனுடைய ஆறு படைவீடுகளும் நம் உடலில் உள்ள ஆறு ஆதாரங்களைக் குறிக்கும். பிரமச்சரிய, கிருகஸ்த, சந்நியாச கோலங்களில் முருகன் வணங்கப்படுகிறார்

1.மூலாதாரம்- திருப்பரங்குன்றம். தெய்வானையுடன் மணக்கோலத்தில் உள்ள தலம்.

2.சுவாதிஷ்டானம்-திருச்செந்தூர். செந்தில்வேலவனாக பக்தர்களது துயர் நீக்கும் தலம்.

3.மணிபூரகம்-பழநி. ஞான தண்டமேந்தி யோக நிலையில் உள்ள தலம்.

4.அநாகதம்- திருவேரகம்-சுவாமிமலை. தந்தைக்கு உபதேசம் செய்த அறிவுத் தலம்.

5.விசுக்தி-திருத்தணிகை. தேவசேனாவுடன் களிப்புடன் இருக்கும் தலம்.

6.ஆக்ஞை-பழமுதிர்ச் சோலை. ஞானப் பழமாக இருக்கும் தலம்

#####

செவ்வாய்க்கிழமை, 17 July 2018 19:45

பைரவ சபை!

ஓம்நமசிவய!

மருப்பையொரு கைக்கொண்டு நாரையூர் மன்னும்
பொருப்பையடி போற்றத் துணிந்தால் - நெருப்பை
அருந்த எண்ணுகின்ற எறும்பன்றே அவரை
வருத்த எண்ணுகின்ற மலம்!

####

பைரவ சபை!

பைரவர்!

இரண்யாட்சனின் வளர்ப்பு மகன் அந்தகாசுரன். சிவனை நோக்கி கடுந்தவமிருந்து யாராலும் வெல்ல முடியாத வரம் பெற்றான். தேவர்கள், முனிவர்களை வென்று பெண்டிரை அவமானம் செய்தான். அனைவரும் சிவனிடம் முறையிட சிவன் தன்னுடைய அம்சமாக காலபைரவரைத் தோற்றுவித்து அந்தகாசுரனை அம்ஹாரம் செய்தார்.

பைரவர் என்றால் எதிரிகளுக்கு பயத்தை தருபவர். தன்னை அண்டியவர்களுக்கு பயத்தைப் போக்கி பலத்தை அளிப்பதால் சிவன் இவருக்கு திரிசூலம் அளித்து காவல் உரிமையை அளித்தார். ஈசனைப்போலவே 64 அம்சங்களை உடையவர் பைரவர். சிவாலயங்களில் பைரவரின் ஏதாவது ஓர் அம்சம் பரிவார மூர்த்தமாக பிரதிஷ்டை செய்யப்பட்டிருக்கும். அஷ்ட-எட்டு திக்குகளிலும் பைரவரே காவல் புரிகின்றார். இந்த சிறப்பான எட்டு வடிவங்களே அஷ்ட பைரவர் என போற்றப்படுகின்றது. கார்த்திகை தேய்பிறை அஷ்டமியில் தோன்றியவர் காலபைரவர். இவர் சூரியனுடைய அம்சத்தை பெற்றவர். ஆதலால் ராகு காலத்தில் ஞாயிறு தோறும் வழிபடுவது சிறப்பு.

சிவபெருமானின் ஐந்து குமாரர்களில் ஒருவர் (கணபதி, முருகன், வீரபத்திரர், ஐயப்பன், பைரவர்)

அஷ்ட பைரவரை பூஜித்து வழிபட்டால் க்ஷேத்திரத்தில் செய்த பாபங்கள் நிவர்த்தி. காசியின் எண் திசைக்கும் காவல் தெய்வங்கள். 1.குருபைரவர்- அனுமத்கட்டம், 2..சண்டபைரவர்- துர்க்காகுண்டம், 3.அஸிதாங்கபைரவர்- விருத்தகாலம், 4.கபாலபைரவர்- லாட்டுபஜார், 5.க்ரோதண பைரவர்- காமாக்ஷாமே, 6.உன்மத்தபைரவர்- பீமசண்டி, 7.சம்ஹாரபைரவர்- திருலோசனா சங்கமம், 8.பீஷணபைரவர்- பூதபைரவம்

தன் ஐந்து தலையால் செருக்குற்ற பிரம்மனின் ஐந்தாவது தலையை பைரவரைக் கொண்டு கிள்ளச் செய்தார். அந்தக் கபாலம் அவர் கையில் ஒட்டிக் கொண்டது. பைரவர் பிரமஹத்தி தோஷத்தால் பல தலங்கள் சுற்றி காசியம்பதியில் அன்னபூரணி அம்மன் அன்னம் அளிக்கும்போது கீழே விழுந்த அன்னத்தை எடுக்க் முயன்ற கபாலத்தைத் தன்காலால் நசுக்கினார். கபாலபைரவராக இருந்து காலபைரவராக மாறி காசியில் அருள்புரிகின்றார். ஒரே பைரவர் எட்டு செயல்களை எண் திசைகளில் செய்யும்போது அஷ்டபைரவராகின்றார்.

அஷ்ட பைரவர்கள்
1.அசிதாங்க பைரவர்-6கரங்கள்.அன்னவாகனம். சக்தி-பிராம்மி,

2.குரு பைரவர்-4கரங்கள், காளைவாகனம், சக்தி-மஹேஸ்வரி,

3.சண்ட பைரவர்-4கரங்கள், மயில்வாகனம், சக்தி-கௌமாரி,

4.குரோத பைரவர்-4கரங்கள், கருடவாகனம், சக்தி-வைஷ்ணவி,

5.உன்மத்த பைரவர்-4கரங்கள், குதிரைவாகனம், சக்தி-வராஹி,

6.கபால பைரவர்- 4கரங்கள், யாணைவாகனம், சக்தி-ஐந்த்ரீ, இந்திராணி,

7.பீஷ்ண பைரவர், சிம்மவாகனம், சக்தி-சாமுண்டி,

8.சம்ஹார (வடுக)பைரவர்-8கரங்கள், நாய்வாகனம், சக்தி-சண்டிகை

#####

செவ்வாய்க்கிழமை, 17 July 2018 16:24

பூமாதேவி!

ஓம்நமசிவய!

களியானைக் கன்றைக் கணபதியைச் செம்பொன்
ஒளியானைப் பாரோர்க் குதவும் - அளியானைக்
கண்ணுவதும் கைத்தலங்கள் கூப்புவதும் மற்றவன்தாள்
நண்ணுவதும் நல்லார் கடன்!

####

பூமாதேவி!

பூமி என்கிற வசுந்தராவிற்கு உர்பி, இஜ்யை, க்ஷிதி, காசியபி, க்ஷௌணி, பவை, அனந்தை, விசுவாம், பிருத்வி என பலப் பெயர்கள் உண்டு.

தேவர்கள் அசுரர்களுக்கு அஞ்சி வாழ்ந்திருந்தாலும் தேவர்களின் கௌரவம் மற்றும் இறையருளும் மேலோங்கி இருப்பதன் காரணம் முனிவர்களும் யோகிகளும் செய்யும் ஹோமத்தில் தரப்படும் ஆகுதி என்ற அவிஸ்ஸே தேவர்களின் பலத்திற்கு காரணம் என்பதை அறிந்த இரண்யாட்சன் தேவர்களுக்கு அவிஸ் கிடைக்காமல் இருக்க என்னவழி என்று யோசித்து பூமியிருந்தால்தான் யாகங்கள் நடைபெற்று தேவர்களுக்கு அவிஸ் கிடைக்கின்றது. எனவே பூமியில்லையென்றால் தேவர்களுக்கு யாகம் நடந்து அவிஸ் கிடைக்காது என்று முடிவுசெய்து பூமியை பாயாகச் சுருட்டி பாதாள உலகத்தில் பதுக்கிவிட்டான். அவிஸ் கிடைக்காமல் துன்பமுற்ற தேவர்கள் பூமியைக் காணாததால் பிரம்மனிடம் முறையிட அவர் திருமாலிடம் சென்று வணங்கி தேவர்களின் துயரத்தை தெரிவித்தார்.

திருமால் வராக அவதாரமெடுத்து பாதாளாலோகம் சென்று இரண்யாட்சனுடன் போர் புரிந்து அவனைத் தன் கோரப்பற்களால் குத்தி கிழித்து பூமியை மீட்டு வந்தார். அசுர சம்ஹாரத்தினால் ஏற்பட்ட கோபம் தீராத வராக மூர்த்தியினால் கடல்வாழ் உயிரினங்கள் துன்பமடைந்தன. முனிவர்கள் கயிலைநாதனிடம் சொல்ல சிவன் தன் கைகளினால் வராகத்தின் கொம்புகளை உடைக்க அதன் ஆவேசம் அடங்கி ஸ்ரீ விஷ்ணுவாக மாறினார். புவிமகள் ஸ்ரீவிஷ்ணுவின் மனைவியானாள்.

வீடு கட்டும் போதும், கிணறு, ஏரி, குளம் வெட்டும் போதும் நிலத்தை பயிரிடும் முன்பும் பூமிதேவியை வணங்க விஷ்ணு அருள் வரம். முத்து, வைரம், மாணிக்கம், துளசி, மலர்கள், சிவலிங்கம், ஜபமாலை, சந்தனம், தீர்த்தம், சாளக்கிரமம், தீபம், யந்திரம், புத்தகம் சங்கு, ஆகியவற்றை நிலத்தின் மீது வைக்காமல் ஆசனத்தின்மீது வைக்க வேண்டும்.

”ஓம் ஹ்ரீம் ஸ்ரீம் கிலீம் வசுதாயை ஸ்வாஹா” என்ற மந்திரத்தைச் சொல்லி வெள்ளைத் தாமரை நிறமும், சரத்காலச் சந்திரன் போன்ற முகமும் சந்தனம் பூசப்பட்ட சர்வாங்கமும் உடையவளாக நவமணிகளால் அலங்கரிப்பட்டு நெருப்பிலான தூய்மையான ஆடைகளை அணிந்து புன்னகையுடன் தோன்றும் பூதேவியே உன்னை நமஸ்கரிக்கின்றேன் என்று தியானித்து “ஜலத்தை அளிப்பவளே, நீரின் சொரூபமாக இருப்பவளே, நீருக்கு ஆதாரமாக இருபவளே, நீரைப் பரிசுத்தம் செய்பவளே, வராஹ மூர்த்தியின் பத்தினியே, எனக்கு வெற்றியைத் தருவாய், நலன்களை அளிப்பாய், மங்களத் தலைவியே, மங்கள ரூபியே, சம்சாரத்தில் மங்களமுண்டாகச் செய்வாயாக, எல்லாம் அறிந்தவளே சர்வ சக்தியே, சகல விருப்பங்களை வழங்குபவளே, புண்ணிய வடிவினளே, புண்ணியத்திற்கு பீஜமானவளே, அனாதியானவளே, எல்லா பயிர்களுக்கும் இருப்பிடமானவளே, சகல சக்தி தரும் பூதேவியே, சுகத்தையும் நிலத்தையும் வழங்குபவளே எனக்கும் அருள் புரிவாய் அன்னையே! என துதித்து வழிபட வேண்டும்.

#####

 

செவ்வாய்க்கிழமை, 17 July 2018 09:45

பத்ரகாளி சபை!

ஓம்நமசிவய!

மொழியின் மறைமுதலே, முந்நயனத் தேறே
கழியவரும் பொருளே, கண்ணே - செழிய
கலாலயனே, எங்கள் கணபதியே, நின்னை
அலாலயனே, சூழாதென் அன்பு!

####

பத்ரகாளி சபை!

பத்ரகாளி!

துர்க்கையின் பிரமஹத்தி!

விப்ரசித்தி அசுரனின் மகள் மகிஷ்மதி உலாவச் சென்றபோது அழகான ஆஸ்ரமத்தைக்கண்டு அதை தன்னுடையதாக்கிக் கொள்ள தீர்மானித்து பெண் எருமை உருவெடுத்து உள்ளே நுழைந்தாள். அங்கிருந்த முனிவர் எருமையாக வந்த அரக்கியின் எண்ணத்தை அறிந்து அவளை நூற்றண்டு காலம் எருமையாக இருக்க சபித்து விட்டார். மன்னிக்க வேண்டிய அரக்கியிடம் அவளுக்கு ஓர் ஆண் மகவு பிறக்கும்வரை அவள் அந்நிலையில் இருப்பாள் என விமோசனம் சொன்னார்.

தணு என்ற அரக்கனின் புதல்வர்கள் ரம்பன், கரம்பன். இருவரும் நன் மக்களைப் பெற தவம் செய்தனர். அப்போது இந்திரன் ரம்பனை அருகிலிருந்த நதியில் மூழ்கடித்துக் கொன்றான். தன் தம்பி அநியாயமாக இறந்தது கண்டு ஹோமம் வளர்த்து தன் தலையை அறுத்து அதில் போட்டு தற்கொலை செய்ய துணிய அக்னி காட்சி கொடுத்து அதிபரக்ரமசாலியான ஒர் மகன் பிறக்க வரம் தந்தான். கரம்பன் காட்டிற்குச் சென்றபோது அங்கு பெண் எருமை உருவில் இருந்த அரக்கியைக் கண்டு மோகித்து அதனுடன் புணர்ந்தான். பாதாள உலகத்தில் அந்த எருமையுடன் உல்லாசமாக இருந்து வந்தான். அப்போது வேறு ஒரு எருமை அந்த பெண் எருமையிடம் வர கரம்பன் அதனுடன் சண்டையிட அது கரம்பனை முட்டிக் கொன்றது. நர்மதை நதிக்கரையில் அவனது சிதைக்கு தீ மூட்டியபோது பெண் எருமையும் தீக்குளிக்க உள்ளே பாய்ந்து இறந்தது. அப்போது அதன் வயிற்றில் இருந்த ரக்த பீஜனாகிய மகிஷன் சிதையிலிருந்து வெளிப்பட்டான். அவனே மகிஷாசுரன். அவன் பிரமனை நோக்கித் தவமிருந்து ஸ்திரி மங்கையால் மட்டுமே தனக்கு மரணம் ஏற்படவேண்டும் என வரம் பெற்றான். அசுரர்களை ஒன்று திரட்டி அசுர வேந்தனாக முடி சூட்டிக் கொண்டான்.

வைஷ்ணவதேவி பூ உலகில் மணம் புரியாமல் தவமிருந்தார். நாரதர் மகிஷாசுரனைக் கண்டு தவமிருக்கும் வைஷ்ணவிதேவின் அழகைக் கூற, அவன் தன் தூதுவனை- வித்யுத்பிரமாவை அன்னையிடம் அணுப்பி தன் வீரதீரச் செயல்களைக் கூறி தன்னை மணக்க வேண்டினான். அன்னையின் தவம் கலையாதிருக்க தேவர்கள் அவன் படையுடன் போரிட்டு தோற்றனர். வித்யுத்பிரமா மகிஷனின் எண்ணத்தை வைஷ்ணவி தேவியிடம் கூறினான். தானே தன் தோழியர்களோ மகிஷனை மணக்கும் எண்ணம் இல்லை என்ற பதிலைக் கேட்ட மகிஷன் பெரும் படையை அனுப்ப மீண்டும் போர் நடந்தது.

பிரம்மனிடம் தேவர்களால் மரணமில்லா நிலையும், அமிர்த பலத்தையும், பிரம்ம தண்டத்தையும் பெற்று எல்லோரையும் துன்புறுத்திய மகிஷாசுரனை அழிக்க பராசக்தி தன் உடலிருந்து மஹேஸ்வரி-காமத்தை அழிக்கும் சிவன் அம்சம், வைஷ்ணவி-லோபத்தை அழிக்கும் விஷ்ணு அம்சம், ப்ராஹ்மீ-மதத்தை அழிக்கும் பிரம்ம அம்சம், கௌமாரி-மோகத்தை அழிக்கும் முருகன் அம்சம், இந்த்ராணி-மாச்சர்யத்தை அழிக்கும் இந்திரன் அம்சம், வராஹி-அசூயை குணத்தை அழிக்கும் விஷ்ணு அம்சம் ஆகிய அறுவரைத் தோற்றுவிக்க அறுவரும் விடாமல் அவனுடன் போர் புரிய அவன் உடலிருந்து பீரிட்ட இரத்தத்திலிருந்து பல்லாயிரக்கணக்கான அவுணர்கள் தோன்றி தொடர்ந்து போர் புரிந்து பரிகாசம் செய்தனர்.

ஈசன் தன் நெற்றியிலிருந்து பத்ரகாளியைத் தோற்றுவித்தார். பார்வதி அவரை உருமாறக் கேட்க குரோதத்தை அழிக்கும் சிவன் அம்சமாக (சாமுண்டா-) தோன்றி அருள் பெற்று மற்ற அறுவருக்கும் முதல்வியாய் பெறுப்பேற்று போரிட்டாள். துர்க்கமன் என்ற அசுரனை கொன்றதால் துர்க்கை எனப் பெயர் பெற்றாள். அசுரர்கள் பக்கம் பெரும் அழிவு ஏற்பட தானே போரிடவந்தான் மகிஷாசூரன். நீண்ட யுத்தத்திற்குப்பின் அன்னை துர்க்கை மகிஷனை தன் சூலத்தால் குத்திக் கொன்றாள். மகிஷாசூரமர்த்தினி எனப்பெயர்.

துர்க்கை, மகிஷனை வதம் செய்தபின் அன்னையை சிவன் சாந்தமடையச் சொன்னதால்- மகிஷாசூரனை கொன்ற பிரமஹத்தி தோசம் நீங்க திருவிழிமீலலை வர கையிலிருந்த சூலாயுதம் நழுவி அருகில் உள்ள தடாகத்தில் விழுந்தது. அசுரனின் இரத்தம் சூலத்திலிருந்து தடாகத்திற்கு மாற தடாக நீர் சிவப்பாகியது. துர்க்கை தடாகத்தில் குளித்து சூலத்தை கையில் எடுக்க அசரீரை ஒலித்தது. 12 ஆண்டுகள் இங்கு தவமிருக்க அசரீரி. தவத்திற்கு ஊறு ஏற்படாமல் இருக்க தவஸ்விக்ன விநாயகர் பிரதிஷ்டை செய்து வழிபட்டார். 12 ஆண்டுகளுக்குப்பின் கையிலைநாதர் பார்வதியுடன் தோன்றி துர்க்கைக்கு பாபவிமோஷனம் அளித்தார். சிவன் கட்டளைப்படி இங்கு மகிஷாசுரமர்த்தினியாக குடி கொண்டதால்-அம்மன் குடி.. நினைத்தது நிறைவேற ராகு காலத்தில் வழிபாடு சிறப்பு. அமாவாசை இரவு 7மணிக்கு சிறப்பு பூஜை. குடும்ப ஒற்றுமை ஓங்கும். எதிரிகள் ஒடுங்குவர்.

போர், பூகம்பம் சூறாவெளி, வெள்ளம் இவற்றின் அச்சங்களைப் போக்குபவள். கால்-காற்று, காலரூபினி கரியநிறமுள்ளவள். காலரூபத்தில் நியதிக்கு அடங்கி வெளி உருவை அழிக்கும் பிராணசக்தி. தீயவர்களுக்கு அச்சம்தரும் விதமாக வாளும் துண்டித்த தலையும் கரத்தில் தாங்கி இருகைகள் அபயவரதத்துடன். நோய்களைத் தீர்ப்பவள். 

ஸ்ரீசக்ர அஷ்டகாளிகள்- ஸ்ரீகாளி, ஸ்ரீபத்ரகாளி, ஸ்ரீமகாகாளி, ஸ்ரீகாளாராத்திரி, ஸ்ரீசர்வமயாமுண்டி, ஸ்ரீசாமுண்டி, ஸ்ரீசரசண்டிகை, ஸ்ரீபைரவி. .

ஸ்ரீதக்ஷிணகாளியின் தாத்பர்யம்- பரந்து அடர்த்தியாக விரிந்த தலைமுடி, கோபக்கனல் வீசும் முகம், செவ்வண்ணத்தில் தொங்கும் அகன்ற நாக்கு கோரைப்பற்கள், கருத்த திருமேனியில் பருத்த தனங்கள், 51 கபாலங்கள் கொண்ட மாலை, வெட்டப்பட்ட பல கரங்கள் கொண்டு புனையப்பட்ட சிற்றாடை, ஒரு கரத்தில் மின்னும் வாள், மறுகரத்தில் குருதி கொட்டும் அசுரனின் தலையுடன் சடலமாக தரையில் கிடக்கும் சிவன் மார்பில் தன் இரு கால்களைப் பதித்து விசித்திர தரிசனம்.

இத் தோற்றத்திற்கான அற்புத தத்துவங்கள்- உயிர்கள் அவளிடமே தோன்றி அவளிடமே ஒடுங்குகின்றன என்பதை அவள் மாலையிலுள்ள கபாலங்கள் உணர்த்தும். மக்கள் செய்யும் நல்வினை, தீவினை அனைத்திற்கும் சக்தியாக இருப்பவள் அவள் என்பதை உடைந்த கரங்கள் கொண்ட உடை அறிவிக்கும். ஆணவத்துடன் மனிதன் செய்யுமற்ப காரியங்களை காலக்கிரமத்தில் அவள் வெட்டி வீழ்த்துகின்றாள் என்பதை வலது மேற்கரத்திலுள்ள வாள் தெரிவிக்கும். இயற்கை நடை முறைகளுக்கு விரோதமான செயல்களில் ஈடுபடும் மனிதன் இறுதியில் தாயின் வாளுக்கு பலியாகி விடுவான் என்பதை வெட்டுண்ட சிரம் விவரிக்கும். காளியை ஆராதிப்பன் வீரனாக இருக்க வேண்டும். பயம் கொண்டவர்களுக்கு அவள் அருள் கிட்டாது. மரண ஸ்வரூபிணியான் அவள் அனுதினமும் சம்ஹாரத் தொழிலை செய்கின்றாள். என்பதை செந்நிற நாக்கு தெரிவிக்கும். காளின் கோரத்தாண்டவம் ஆடும் இடம் சுடுகாடு. ஆசை, காமம், வெகுளி எல்லாம் பஸ்பமாகும் இடமான சுடுகாடாக நம் மனம் மாற வேண்டும் என்பதை தாண்டவம் குறிக்கும்.

தாருகனை வதம் செய்த பின்னரும் காளின் கோபம் தணியாததால் உலக உயிர்களைக் காப்பாற்ற சிவனார் தரையில் சடலம்போல் படுத்திருக்க அவர் மார்பில் ஏறி ஊழிக்கூத்தாடினாள் காளி. உடன் சிவனார் கைக்குழைந்தையாக மாறி அழுக காளியின் கவனம் குழந்தைமீது திரும்ப தாய்ப்பாசம் பீறிட குழந்தையை வாரி எடுத்து ஸ்தன்ய பானம் கொடுத்தாள். குழந்தையான சிவன் காளியின் உள்ளத்தில் கொதித்துக் கொண்டிருந்த கோபத்தையும் சேர்த்து பாலாக உறிஞ்சி விடவே காளி சாந்தமடைந்தாள். இதனால் சிவனுக்கு சேத்திரபாலன் என்ற பெயர் உண்டானது. அப்போது அந்த கோபசக்தியினால் சிவனிடமிருந்து அஷ்டசேத்ரபாலர்கள் தோன்றினர்.

உக்கிரம் தனியத் தனிய அழகிய நங்கையானாள். அவளை மேலும் சாந்தப் படுத்த மகேசன் நர்த்தனம் புரிந்தார். அதனால் கவரப்பட்ட காளியும் நடனம் ஆடினாள். அன்று முதல் சந்தியா நேரத்தில் ஈசனும் காளியும் சந்தியா தாண்டவம் ஆடலானார்கள்

ஸ்ரீகாளியின் மூல மந்திரத்தால் யாகம் செய்தால் அதிதீயான தைரியம், வாக்குவன்மை, முன்கூட்டியே அறியும் தன்மை, நிலையான செல்வம், நோயற்ற வாழ்வு கிட்டும்.

கிராமங்களில் இந்த எழுவரையும் கன்னிமாராக 1.பட்டரிகா, 2.தேவகன்னிகா, 3.பத்ம கன்னிகா, 4.சிந்து கன்னிகா, 5.அகஜா கன்னிகா, 6.வன கன்னிகா, 7.சுமதி கன்னிகா எனப் போற்றி வழிபடுகின்றனர்

இரண்யன் வம்சத்தில் பிறந்த சும்பன், நிகம்பன் அசுரர்கள் பிரம்மனிடம் பெண்களைத்தவிர மற்ற எவராலும் மரணம் ஏற்படக்கூடாது என்று பெற்ற வரத்தினால் ஆணவம் கொண்டு அனைவரையும் துன்புறுத்த தேவர்கள் தேவியை சரணடைய நீராடிக்கொண்டிருந்த தேவி தன் உடம்பிலிருந்து ஒர் சக்தியை தோற்றுவித்து- கௌசிகி அனுப்பியதால் தேவி நீல நிறமானாள். சும்ப நிகம்பர்கள் தேவியைப் பற்றி உளவு பார்க்க அனுப்பியவர்கள் தேவியின் சேனைப் பற்றிச் சொல்லாமல் அவரின் அழகு பற்றிச் சொல்ல சுக்ரீவன் எனும் தூதுவன் மூலம் மணம் புரிய தூது விடுத்தனர். தேவி போரில் என்னை யார் வெல்லப் போகின்றார்களோ அவர்களையே தான் மணமுடிப்பதாகச் சொன்னார். தூம்ரலோசனன் என்ற சேனாபதி தேவியால் எரித்துக் கொல்லப்பட சண்டன் முண்டன் என்ற இரு சேனாதிபதிகள் வர அவர்களையும் சம்ஹரித்தாள் தேவி. அதனால் அன்னை அவளுக்கு சாமுண்டா எனப்பெயர் சூட்டினாள்.

தன் சேனாபதிகள் இறந்ததனால் சும்பன், நிகம்பன் இருவருமே சேனாபதி ரத்த பிந்துவுடன் போருக்கு வந்தனர். ரத்த பிந்து உடம்பிலிருந்து கீழே விழுந்த ஒவ்வொரு துளி இரத்தத்திலும் அசுரர்கள் தோன்றிவே அன்னையிடமிருந்து அஷ்ட மாத்ருகா- அஷ்ட துர்க்கைகள்: 1.வசினி, 2.காமெசி, 3.மோதினி, 4.விமலா, 5.அருணா, 6.ஜயினி, 7.சர்வேஸ்வரி, 8.கௌலினி தோன்றினர்.

அன்னையின் உடம்பின் ஒவ்வொரு பாகத்திலிருந்து 64 பேரைத் தோற்றுவித்தாள். எட்டு பேராக பிரித்து அவர்களுக்கு ஒரு தலைவியாக இந்த எட்டு பேரையும் தோற்றுவித்தாள். அஷ்டமாசித்தி பெற்ற அந்த தெய்வங்கள் ஒவ்வொரு தலைவிக்கும் தங்கள் திவ்ய சக்திகளை வழங்கினார்கள். இந்த 64 பேரும் யோகினிகள் எனப்பட்டனர். ஒவ்வொரு யோகினிக்குள்ளும் ஒரு கோடி யோகினிகள். மொத்தம் 64 கோடி யோகினிகள். இவர்கள் இரத்த பீஜனின் உடலிலிருந்து ரத்தம் கீழே சிந்தி உயிர் பெறுவதற்கு முன்பே இரத்தம் நிலத்தில் வீழாமல் குடிக்க ரத்தபீஜன், சும்பன், நிகம்பன் அசுரர்களை வதம் செய்தாள். இவர்கள் உலக இயக்கங்களுக்கு காரணமாகிறார்கள். சாக்தம் எனப்படும் சக்தி வழிபாட்டின் முக்கிய பரிவாரங்கள் இந்த யோகினிகள்தாம்.

துர்க்கா பூஜை ஆஸ்வின் மாதம்-புரட்டாசி கிருஷ்ணபட்சத்தில் நவமியன்று தொடங்கி பதினைந்து தினங்கள் பூஜை செய்து சுக்லபட்ச தசமியன்று நீரில் சேர்க்க வேண்டும். மிருக பலி யில்லாமல் செய்யும் பூஜை வைஷ்ணவி பூஜை-சாத்வீகபூஜை. விலங்குகளை பலிகொடுத்து செய்யும் பூஜை துர்கா பூஜை. பலிகளை சப்தமி, நவமி திதிகளில் செய்யலாம். அஷ்டமியில் செய்யக்கூடாது.

சிவபெருமானின் மனைவி என்பதால் சிவை. விஷ்ணுவின் அம்சம் வைஷ்ணவி/ விஷ்ணுவின் மாயை, நாராயணின் சக்தியைப் பெற்றிருப்பதால் நாராயணி. மேலும் இஷானி, சத்யை, நித்யை, சனாதனி, பகவதி, சர்வானி, சர்வமங்களா, கௌரி, பார்வதி, அம்பிகை என்று பல பெயர்கள் கொண்டவள்.

நரம்பின் அதிபதியான இவள் சினம் கொண்டாள் ஊரில் கலகம் உண்டாகும். தயிர் அபிஷேகம், அவல், சேமியா நிவேதனங்கள் படைத்து விநியோகம் நலன். பக்தர்களின் துன்பங்களை நீக்குபவள்.

“ஓம் க்ருஷ்ண வர்ணாயை வித்மஹே
சூல ஹஸ்தாயை தீமஹி
தன்னோ, சாமுண்டா ப்ரசோதயாத்.

துக்கங்களை போக்குவதால் துர்க்கா என்றழைக்கப்படும் துர்க்காவின் மற்ற திருநாமங்கள்!
வனதுர்க்கா-கொற்றவை. மகாவித்யாவே வனதுர்க்கையாவாள். வனம்-காடு. தன்னை வழிபடுபவர்களை சம்சாரமாகிய காட்டிலிருந்து காப்பவள். - கதிராமங்கலம், தருமபுரம் (மயிலாடுதுறை)

சூலினிதுர்க்கா- சரபேஸ்வரின் இறக்கை ஒன்றில் இருப்பவள். சிவனின் உக்ரவடிவானவள். முத்தலை சூலத்தினை கையில் வைத்திருப்பதால் சூலினி துர்க்கா. - அம்பர்மாகாளம்

ஜாதவேதோ துர்க்கா- சிவனின் நெற்றிக் கண்னிலிருந்து உருவான தீப்பொறிகளை கங்கையில் சேர்த்ததால் ஜாதவேதோ எனப்பெயர்.

சாந்தி துர்க்கா- தன்னை வழிபடுபவர்களின் துன்பங்களையெல்லாம் நீக்கி வாழ்வில் சாந்தி நிலவ வழி செய்பவள்.

சபரி துர்க்கா- சிவன் வேடுவ உருவம் எடுத்தபோது வேடுவச்சி உருவம் எடுத்த பார்வதியார் சபரிதுர்க்கா.

ஜ்வால துர்க்கா-ஆதிபராசக்தி பாண்டாசுரன் போரில் எதிரிகள் அருகில் வராமல் இருக்க அக்னி ஜ்வாலையுடன் கூடிய பெரிய நெருப்பு வட்டத்தை அமைத்தவள் இந்த ஜ்வாலாதுர்க்கா.

லவணதுர்க்கா- லவணாசுரனை அழிக்க புறப்பட்ட லட்சுமணன் வெற்றி கிடைக்க வழிபட்ட துர்க்கை லவண துர்க்கா

தீபதுர்க்கா -பக்தர்களின் மனத்தில் இருக்கும் அஞ்ஞானம் என்ற அக இருளை நீக்கி மெய்ஞாசமான ஒளியை வழங்குவது தீபதுர்க்கா.

ஆசுரி துர்க்கா-பக்தர்களிடையே உள்ள காமம் முதலான குணங்களை அழித்து மோட்சத்திற்கு அழைத்துச் செல்பவள். ஆசுரி துர்க்கா.


சப்த கன்னியர் -சப்த மங்கையர்-சப்த மாதர்
சப்த மங்கையரும் காளிதேவிக்குத் துணையாகப் போருக்குச் செல்லுமுன் ஒவ்வொருவரும் ஒவ்வோர் தலத்தில் சிவபூஜை செய்தனர். சக்கரப்பள்ளி- சக்ரமங்கை, ஹரிமங்கை- அரிமங்கை, சூலமங்கலம்- சூலமங்கை, நல்லிச்சேரி- நந்திமங்கை, பசுபதிகோவில்- பசுமங்கை, பசுபதிகோவில் -தாழமங்கை, பசுபதிகோவில் –திருப்புள்ளமங்கை இந்த எழு தலங்களிலும் மங்கைப் பருவ தேவியர் சிவ பூஜை செய்து சிவதரிசனம் பெற்ற ஏழு தலங்களும் சப்த மங்கைத் தலங்கள் எனப்பட்டன. ஏழு தலங்களும் தஞ்சை மாவட்டம் அய்யம்பேட்டை அருகில் உள்ள தலங்கள்.

அந்த தலங்களில் உள்ள அம்மன் பெண்களின் ஏழு பருவங்களையும் காட்சியாக ஒவ்வொரு தலத்தில் காசி தம்பதியினருக்கு அளித்துள்ளனர். சப்த மங்கைகள் தரிசித்த இந்த ஏழு தலங்களுக்கும் பார்வதி வந்தபோது இறைவன் சிறப்பு காட்சி தந்ததால் இத்தலங்களின் தரிசனம் 1.நெற்றிக்கண் தரிசனம், 2.கங்காதேவி தரிசனம், 3. திரிசூல தரிசனம், 4.பாத தரிசனம், 5.உடுக்கை தரிசனம், 6.மூன்றாம்பிறை தரிசனம், 7.நாக தரிசனம் எனப்படும்.

சப்த கன்னியர், மங்கையர், மாதர் !

1. பிராம்மி- - பூஜை செய்து மற்ற மங்கைகளுடன் வழிபட்ட தலம். சக்கரப்பள்ளி-சக்ரமங்கை- தேவாரப் பாடல் பெற்ற தலம். பிராம்மி வழிபட்டதால் சக்கரவாகீஸ்வரர் எனும் திருப்பெயருடன் மங்கை சேர்ந்து சக்கரமங்கை என அழைக்கப் படுகின்றது. இந்த அம்பிகை தேவநாயகி, காசியிலிருந்து வந்த நாதன்சர்மா அனவித்யை தம்பதியர் வேண்டுதலுக்கு இணங்கி பெண்களின் ஏழு பருவங்களில் முதலாவதான பேதைப் பருவ சிறுமியாக காட்சி. பிராம்மி-பிரம்மாவின் படைப்புக்கு துணை, அன்னவாகனம். நான்கு கரங்கள். குண்டம், அட்சயப் பாத்திரம், ஜெபமாலை, ஓமக் கரண்டி ஏந்தியிருப்பாள்.

2. மகேஸ்வரி-- பூஜை செய்து மற்ற மங்கைகளுடன் வழிபட்ட தலம். ஹரிமங்கை- அரிமங்கை. நெல்லிவனமாக இருந்த இந்த இடத்தில் நெல்லிக்கனியை உண்டு சத்ய கங்கை தீர்த்தத்தில் நீராடி ஹரிமுக்தீசுவரரை வழிபட்டு மகாலட்சுமி, திருமாலை ஒருகாலும் பிரியா வரம் பெற்ற தலம். இந்த அம்பிகை ஞானம்பிகை, காசியிலிருந்து வந்த நாதன்சர்மா அனவித்யை தம்பதியர் வேண்டுதலுக்கிணங்கி பெண்களின் ஏழு பருவங்களில் இரண்டாவதான பெதும்பை (பள்ளி) பருவ சிறுமியாக காட்சி. மகேஸ்வரி- ஈசனின் இடப்பக்கம் இருந்து தீமைகளை ஒழிப்பதில் உறுதுணை,

3. நாராயணி-(வைணவிதேவி) பூஜை செய்து மற்ற மங்கைகளுடன் வழிபட்ட தலம். நல்லிச்சேரி- நந்திமங்கை. நந்திகேசுவரர் ஈசனை பூஜித்து நடராஜர் பாத தரிசனம் கண்ட தலம். ஈசன் ஜம்புகேஸ்வரர். இந்த அம்பிகை அலங்காரவல்லி, காசியிலிருந்து வந்த நாதன்சர்மா அனவித்யை தம்பதியர் வேண்டுதலுக்கிணங்கி பெண்களின் ஏழு பருவங்களில் நான்காவதான கன்னிகை வடிவில் காட்சி. நாராயணி-அனைத்து உலகங்களையும் பரிபாலனம் செய்ய திருமாலுக்கு உதவி.

4. வாராகி- பூஜை செய்து மற்ற மங்கைகளுடன் வழிபட்ட தலம். பசுபதிகோவில்- பசுமங்கை. பசுபதி நாதரின் உடுக்கையிலிருந்து எழும் ஆதி நாதத்தைக் கேட்டு அதிலிருந்து பிரபஞ்சங்கள் உற்பத்தி ஆவதை அறிந்தாள் அம்பிகை. ஈசன்- பசுபதீஸ்வரர். பால்வளைநாயகி, காசியிலிருந்து வந்த நாதன்சர்மா அனவித்யை தம்பதியர் வேண்டுதலுக்கிணங்கி பெண்களின் ஏழு பருவங்களில் ஐந்தாவதான அரிவை எனப்படும் தாய்ப் பருவத்தினளாக காட்சி.

பரந்தாமனின் வராஹ வடிவுடன் இனைந்தவள், மேக நிறம். வராஹ-பன்றி முகம். கலப்பை, உலக்கை, வாள், கேடயம், சங்கு, சக்கரம், அபய வரத முத்திரையுடன் காட்சி தருபவள்.. காட்டுப்பன்றிகள் இழுக்கும் கிரி சக்ர ரதம் இவரது வாகனம். எப்பொழுதும் அம்பிகையை விட்டு நீங்காமல் இருக்கும் இரு சக்திகள் சியாமளா என்கிற மந்த்ரிணி, மற்றும் வாராஹி என்கிற தண்டினி ஆவர். இராஜராஜேஸ்வரியின் சேனாநாயகி. பயம் நீக்கி ஜயம் அருள்பவள். குற்றம் புரிந்தோரை தண்டிப்பதில் திட சித்தமும் தீர்க்கமான அறிவும், தீரமும், வீர்யமும் கொண்டவள். ‘வீர்யவதி” பிரளயத்தின்போது பூமியை வெளிக்கொணர விஷ்ணுவிற்கு துணையாகி பூமித்தாயானவள். நம் புருவ மத்தியில் உள்ள ஆக்ஞா சக்தியில் உறைபவள். காசி நகரை இரவில் உலாவந்து காப்பவள் வராஹியே!

ஆஷாட நவராத்திரி வராஹிக்கு உரியதாகப் கருதப் படுவதால் ஆனிமாத அமாவாசை முதல் ஒன்பதுநாட்கள் சிறப்பாக கொண்டாடப்படுகின்றது.

காட்சி தலம்: திருமால்பூர் அருகில் உள்ள பள்ளூர், தஞ்சை பெரிய கோவில் அக்னிதிசையில். காசியில்.

வராஹி உபாசனை உள்ளவர்களிடம் வாதாடக்கூடாது என்பதற்கேற்ப வழக்குகளிலிருந்து விடுபட அருள். எலும்பிற்கு அதிதேவதையான வராஹி கோபமுற்றால் வாதமும் பித்தமும் ஏற்படும். பொதுவாக வெள்ளரிக்காயும், முறுக்கும் நிவேதனம். பஞ்சமி தினத்தன்று கிழங்கு வகைகள் சமைத்து விநியோகம் செய்தால் முன் வினைகள் அகலும். 5 பஞ்சமி / ஞாயிறு தினங்களில் நெய் விளக்கேற்றி தேங்காய் உடைத்து வழிபட்டால் நற்பலன்.

“ஓம் சியாமளாயை வித்மஹே
ஹல ஹஸ்தாயை தீமஹி
தன்னோ வாராஹி ப்ரசோதயாத்”

5. இந்திராணி- பூஜை செய்து மற்ற மங்கைகளுடன் வழிபட்ட தலம். பசுபதிகோவில் –தாழமங்கை. தட்சன் சாபத்தால் தேய்ந்த சந்திரன் வழிபட்டத்தலம். தாழம் புதரில் தோன்றியவர் சந்திரமௌளீச்வரர். இந்த அம்பிகை ராஜராஜேஸ்வரி,, காசியிலிருந்து வந்த நாதன்சர்மா அனவித்யை தம்பதியர் வேண்டுதலுக்கு இணங்கி பெண்களின் ஏழு பருவங்களில் ஆறாவதான தெரிவை வடிவில் காட்சி. இந்திராணி -இந்திரனுக்கு உதவி, ஐந்தீரி எனப்படுபவள். நான்கு தந்தங்களுடைய வெள்ளயானையை வாகனமாகக் கொண்டவள். இந்திர நீலக்கல்லின் நிறம். 1000 கண்களுடைய இவள் கரத்தில் வஜ்ராயுதம், பாசம், அங்குசம், தாமரை, அபயவரத முத்திரையுடன் காட்சி தருபவள். தாமரை மலரில் வீற்றிருப்பவள்.

விரும்பும் ஆடவரை மணக்க அருள் புரிவாள். சிவனை நோக்கித் தவமிருந்து இந்திரனை கணவனாய் அடைந்தாள். சதியின் அதிதேவதையான இவள் கோபம் கொண்டாள் அம்மை நோய் பெருகும். வேப்பிலையால் விசிறி சந்தனம் பூசி, பலாச்சுளை நிவேதனம் நலம்.
‘ஓம் ச்யாம வர்ணாயை வித்மஹே
வஜ்ர ஹஸ்தாயை தீமஹி
தன்னோ ஐந்த்ரீ ப்ரசோதயாத்”

6. கௌமாரி- பூஜை செய்து மற்ற மங்கைகளுடன் வழிபட்ட தலம். சூலமங்கலம்- சூலமங்கை- சூலதேவர் இங்குள்ள கிருத்திவாஸேஸ்வரிடம் எப்போதும் காவல் காக்கும் வரம் பெற்றார். இந்த அம்பிகை காசியிலிருந்து வந்த நாதன்சர்மா அனவித்யை தம்பதியர் வேண்டுதலுக்கிணங்கி பெண்களின் ஏழு பருவங்களில் மூன்றாவதான மங்கை பருவத்தினளாக காட்சி. கௌமாரி-முருகனின் சக்தி, வாகனம் மயில். இரண்டு கைகள் ஒன்றில் ஈட்டி ஏந்தியிருப்பாள்.

7. சாமுண்டி- பூஜை செய்து மற்ற மங்கைகளுடன் வழிபட்ட தலம். பசுபதிகோவில் –திருப்புள்ளமங்கை. அஷ்ட நாகங்களுடன் வந்து வழிபட்டதால் நாகதோஷம் நீக்கும் தலம். பிரம்மன் தவம்செய்து வழிபட்ட பிரம்மபுரீஸ்வரர். இந்த அம்பிகை அல்லியங்கோதை காசியிலிருந்து வந்த நாதன்சர்மா அனவித்யை தம்பதியர் வேண்டுதலுக்கிணங்கி பெண்களின் ஏழு பருவங்களில் ஏழாவதான பேரிளம் பருவத்தினளாக காட்சி மஹிஷாசுரமர்த்தினி, சிவகாளி, பத்ரகாளி எனப்படுபவள். ரத்த சாமுண்டா, ப்ரம்ம சாமுண்டா எனவும் துதிக்கப்படுபவள். சிவசக்தியின் அம்சம். தேவர்களுக்கும், முனிவர்களுக்கும் போரில் வெற்றிபெற அருள் புரிபவள். மனித உடல் ஒன்றின் மீது அழுந்திய பாதம். ஈட்டி, மண்டைஓடு, சூலம், வாள்கள் ஏந்தியிருப்பாள்.

இந்த சப்தகன்னியர் -சப்த மங்கையர்-சப்தமாதர் ஏழு பேரும் தனித்தனியாகவோ அல்லது ஒன்று கூடி செல்லியம்மனாக பக்தர்களின் துயர் நீக்கி அருள்புரிய அருள் புரிந்தார் ஈசன்,

காளியின் பிரமஹத்தி!
அம்பன், அம்பாசூரன் அசுரர்களை கொன்றபாவம் தீர காளி வழி பட்டது.-அப்பர் மாகாளம்

#####

திங்கட்கிழமை, 16 July 2018 09:31

ராஜலட்சுமி சபை!

ஓம்நமசிவய!

ஏத்தி எனதுள்ளம் நிற்குமால் எப்பொழுதும்
மாத்தனி வெண்கோட்டு மதமுகத்துத் தூத்தழல் போல்
செக்கர் திருமேனிச் செம்பொற் கழலைங்கை
முக்கட் கடாயானை முன்!

#####

ராஜலட்சுமி சபை!

லட்சுமி!

பிரம்மன் ஆலோசனைப்படி தேவர்களும் அசுரர்களும் சேர்ந்து மந்தாரமலையை மத்தாக்கி வாசுகி பாம்பை கயிராக்கி பாற்கடலைக்கடைய அதற்கு மகாவிஷ்ணு கூர்ம வடிவெடுத்து உதவி புரிய மற்றபொருட்கள் தோன்றியபோது லட்சுமியும் தோன்றினாள்.

எல்லா உலகங்களில் உள்ளவர்களாலும் பூஜிக்கப்படுபவள் லட்சுமி. சத்யம் தவறாதவர்கள், சூரிய- சந்திர மண்டலங்கள், பால், தானியம், உடைகள், சந்தனம், நகைகள், தூய இல்லங்கள், புஷ்பங்கள், மங்கலக் கலசங்கள் என மங்களகரமான எல்லா இடங்களிலும் அவள் வசிக்கின்றாள்.

இந்திரன் லக்ஷ்மியை தொடர்ந்து பூஜித்து வந்தான்- ஒருசமயம் துர்வாச மகரிஷி திருமகளிடமிருந்து பெற்ற மாலையை தேவேந்திரனிடம் கொடுத்தார். ஆணவம் சேர்ந்திருந்த நிலையில் அந்த மாலையின் பெருமையை அறியாத இந்திரன் யானையின் தலையில் வைத்தான். செருக்குடன் இருந்த வெள்ளையானையும் அந்த மாலையை பிய்த்துப் போட்டது. லட்சுமி தேவியின் மாலைக்குரிய மரியாதை தராத செயல் பிரமஹத்தி தோஷத்திற்குச் சமம். வெகுண்ட துர்வாசர் உன்னிடமிருக்கும் சகல செல்வங்களும் உன்னைவிட்டு விலகட்டும் எனச் சாபமிட்டார்.

ஒன்றை தவறு என தெரிந்தால் செய்ய மாட்டோம். செய்தபின் தெரிந்தால் மன்னிப்பு கேட்க வேண்டும். இந்திரன் மன்னிப்பு கேட்டாலும் சாபப்படி லட்சுமி இந்திரனுடைய அமராவதி பட்டணத்தை விட்டு அகல சகல செல்வங்களையும் இழந்தான். பிரம்மனிடம் சென்று ஆலோசனை செய்தான். இருவரும் மகாவிஷ்ணுவிடம் செல்ல அவர் அருள் பெற்று லட்சுமி பூஜை செய்து இழந்த லட்சுமி கடாட்சமான செல்வங்களை பெற்றான்.

தன் கணவன் விஷ்ணு பெண் ரூப மெடுத்து சிவனுடன் கூடியதை அறிந்து அதிர்ச்சியும் கோபமும் கொண்டு சிவனிடம் தன் கோபத்தைக் காட்ட சிவனைத் தேடினாள். எங்கும் காணமுடியாததால் பூலோகத்திற்கு வந்தாள். தவமிருக்க ஆரம்பித்தாள். பல யுகங்கள் கடந்தன. வில்வ மர ரூபங்கொண்டு வில்வத்தை ஈசன்மேல் பொழிந்தாள். காலம் கனிய சிவன் காட்சி கொடுத்தார். ஐயப்பன் அவதாரம் நிகழவேண்டியிருந்த காரணத்தையும் அதற்காக நடந்த நிகழ்வுகள் அவை என்பதை விளக்கி லட்சுமியை அமைதிப்படுத்தினார். வில்வம் வர்ஷித்த லட்சுமியை ஐஸ்வர்ய லட்சுமியாய் திகழ வரம் அளித்தார். தன் அருளின் அடையாளமாக ஸ்ரீவத்ஸ முத்திரையுடன் கூடிய சாளக்கிராமமாக உருவகம் செய்து எப்போதும் விஷ்ணு மார்பில் இருக்கச் செய்தார். மகாலட்சுமியை தன் இதயத்தில் ஏற்று கௌஸ்துப மணியைத் தரித்திருக்கும் மகாவிஷ்ணு ஸ்ரீநிவாஸன் எனப் பெயர் பெற்றார். மகாலட்சுமியால் அவருக்கு மந்திரசக்தி, இச்சாசக்தி, ஞானசக்தி, க்ரியாசக்தி அனைத்தும் கிடைத்தன. சுக்கிரன் யோகத்திற்கு அதிபதி ஆனதும், குபேரன் தனாதிபதி ஆனதும் இங்கு வழிபட்டுதான். இராவணன் சிவனை வழிபட்டு ஈஸ்வரப் பட்டம் பெற்ற தலம். மன்மதனுக்கு அரூப அழகுடலை அளித்ததால்-திருக்காமேஸ்வரர்- மன்மதபாணம் அம்பிகை மீதுபட்டதால்- சிவகாமசுந்தரி, மன்மதனுக்கு வைத்தியம்- வைத்தியநாதர். போகர், பாம்பாட்டிசித்தர், புலிப்பாணிசித்தர் தவம் மேற்கொண்ட தலம். வெள்ளூர்-முசிறி-6,திருச்சி-31

தஞ்சை மன்னன் கோச்செங்கன் பரிவாரங்களுடன் சிதம்பரம் சென்று தரிசனம் செய்து அடுத்தநாள் காலை திரும்பி வந்து விடுவது வழக்கம். ஒரு நாள் நடராஜரின் அர்த்தஜாம பூஜைக்காக அடர்ந்த காடாக இருந்த ஒருஊரைத் தாண்டிச் செல்லும்போது கொண்டுவந்திருந்த தீவட்டிகள் அனைந்து விடவே கூட வந்தர்கள் அடுத்த நாள் அவருடன் வர பயந்தனர். நடராஜர் தரிசனம் முடிந்து கண்ணயர்ந்த கோச்செங்கன் கனவில் மகாலட்சுமி தோன்றி என்னைக் கவனியாமல் நான் இருக்கும் ஊரை நீ தாண்டி சென்றதால் தீவட்டிகள் அணைந்தன என்றார். தீவெட்டியின் திரிகளை நிறுத்திவிட்டதால் திரி நின்றவூர் என்பது திருநின்றவூர் என்றானது. மகாலட்சுமி தினமும் சிவனை வணங்கியதால் காட்சி- பெருமாள் மார்பில் இருக்கும்படி வரம் பெற்றார்- மகாலட்சுமிபுரீஸ்வரர்.

தன்னை எப்போதும் கேலி செய்து கொண்டிருக்கும் திருமாலின் தலை ஒருநாள் கடலில் போய்விழ எனத் திருமகள் சொன்னது சாபமாக மாறியது. திருமால் ஒருசமயம் களைப்பால் தன்னிடமிருந்த வில்லை தன் மேவாய்க்கு முட்டுக் கொடுத்தபடி உறங்கினார். அப்போது குதிரைமுகம் கொண்ட அரக்கன் ஹயக்கிரீவனுடைய தொல்லைகள் தாளாமல் இந்திரன் பெருமாளிடம் முறையிட வந்தான். வந்தவன் திருமால் அயர்ந்து உறங்குவதைப் பார்த்து எழுப்ப மனமில்லாமல் அங்கேயே காத்திருந்தான். அப்போதும் திருமால் கண் திறக்க வில்லையாதலால் என்ன செய்வது என்று புரியாமல் முக்கண்ணனிடம் சென்று சொன்னான். அவர் ஆலோசனைப்படி கரையான் உருவெடுத்து வில்லின் நானை அறுக்க அறுபட்ட நாண் வேகத்துடன் சென்று திருமாலின் கழுத்தை அறுக்க அவர் தலை திருமகள் கொடுத்த சாபத்தினால் கடலில் போய் விழுந்தது.

திருமால் தலையில்லாமல் இருப்பதைப் பார்த்த இந்திரன் முதலான தேவர்கள் அதிர்ச்சியடைந்தனர். பிரம்மா மற்றும் தேவர்கள் ஆதி சக்தியை வணங்க அன்னை தோன்றி குதிரை முகம் கொண்ட அரக்கன் தன் இனமான ஹயக்கிரீவனே தன்னைக் கொல்ல வேண்டும் என அரிய வரம் பெற்றுள்ளான். அந்த இனத்தில் அவன் ஒருவனே இப்போது உயிருடன் இருக்கின்றான். அதனால் அவனின் அட்டூழியங்கள் அளவிட முடியததாகிவிட்டது. அவன் அழியும் காலம் கூடிவந்துள்ளது. ஓர் அசுவத்தின் தலையை திருமாலுக்குப் பொருத்துங்கள் எனக் கூறினார். பிரம்மா அப்படியே செய்தார்.

ஹயக்கிரிவர் அசுர ஹயக்கிரிவனை வதம் செய்தார். ஆதி மகாலட்சுமி ஹயக்கிரிவருடன் இனைந்து வழிபடும் மக்களுக்கு அனைத்து செல்வத்தையும் வழங்குகின்றார்.

உலகம் உழிக்காலத்தில் அழிந்து எங்கும் நீர் நிலைகளாக இருக்க இரு உயிர்கள் தோன்றின. உயிர்களே இல்லாமல் தாங்கள் மட்டும் எப்படி உயிருடன் இருக்கின்றோம் என அதிசயப்பட்ட மது, கைடபர்கள் தங்களை உருவாக்கிய சக்தியை நோக்கித் தவம் இருந்தனர். சக்தி காட்சிதர தாங்கள் இருவரும் விரும்பினால் மட்டுக் மரணம் என வரம் பெற்றனர். பெற்ற வரத்தால் தங்களது திறமைகளைத் தெரிந்து கொள்ள முடியவில்லை. தோள்கள் திணவெடுத்தன.

பிரம்மா அந்தப் பக்கம் வர அவரிடம் சண்டையிட்டு அவரிடமிருந்த நான்கு வேதங்களையும் அபகரித்து பாதாள லோகத்தில் பதுக்கி வைத்தனர். பிரம்மா ஹயக்கிரிவரிடம் தஞ்சமடைந்தார். ஹயக்கிரிவர் அரக்கர்களிடம் போர் புரிந்தார். போர் 5000 ஆண்டுகள் ஆகியும் முடிவிற்கு வரவில்லை. ஹயக்கிரிவர் ஞானதிருஷ்டியில் அவர்கள் பெற்ற வரத்தை அறிந்தார். ஆதிசக்தியை நினைத்தார். ஆதிசக்தி அழகிய பெண்ணாக மோகினியாக அங்கு தோன்ற இரு அரக்கர்களின் கவனமும் சிதறியது. சித்தம் குழம்பியது. அழகியைக் கண்ட மயக்கத்தில் இருந்த இருவரையும் நோக்கி நீங்கள் வேண்டும் வரம் என்ன எனக் கோட்டார் திருமால். நுணலும் தன் வாயால் கெடும் என்பதுபோல –தவளை தன் இருப்பிடத்தை தன் குரலால் சொல்வதுபோல- செருக்கு கொண்ட அரக்கர்கள் உன் வரம் எங்களுக்குத் தேவையில்லை, நாங்கள் வேண்டுமானால் வரம் தருகின்றோம் நீ வேண்டுவது கேள் என்று தங்கள் அழிவிற்கு தங்கள் வாயாலே வழிதேடினர். திருமால் புன்னகையுடன் உங்களின் இருவரின் உயிர்தான் எனக்கு வரமாக வேண்டும் என்றார். மயக்கத்தில் தாங்கள் செய்த பிழையை உணர்ந்தனர். இருப்பினும் ஹயக்கிரிவருடன் போரிட்ட அரக்கர்கள் இருவரையும் வதம் செய்தார்.

உக்கிரமாக இருந்த ஹயக்ரீவரின் மடியில் லட்சுமி அமர்ந்தால் சாந்தமானார்-லட்சுமி ஹயக்ரீவர் எனப்பட்டார்.

துளசிச் செடி இல்லாத வீடு, சங்கு இல்லாதவீடு, சாளக்கிராமம் பூஜிக்காதவீடு, விஷ்ணு பக்தர்களை பழிக்கும் இல்லம், வேதியர்களுக்கு மரியாதை செய்து உணவளிக்காத இல்லம், விருந்தினரை வரவேற்று உபசரிக்காத இல்லம் ஆகியவற்றிலிருந்து லட்சுமி விலகிவிடுவாள் என்கின்றது வேதம்.

பூஜைக்கு உகந்த நாட்கள்- செவ்வாய், வெள்ளி, ஞாயிறு, பௌர்ணமி தினங்கள் சிறப்பு, எந்நாளும் வழிபடலாம்.

உகந்த மலர்கள்- செந்தாமரை, தாழப்பூ, செண்பகம், முல்லை, மல்லி, பவளமல்லி (பாரிஜாதம்) சிறப்பு. தும்பை, அருகம்புல் தவிர மற்ற பூக்களை உபயோகிக்கலாம்.

வரலட்சுமிவிரதம்: வற்றாத செல்வமும், நிலைத்த தாலிபாக்யமும், கீர்த்தியும் பெற அன்னை மகாலட்சுமிக்கு பூஜை- வரலட்சுமிவிரதம் இருந்து பூஜிக்க வேண்டும். வியாழக்கிழமை மாலையிலிருந்து பூஜைக்கான ஆயத்தங்களைத் துவக்கி வீட்டை நன்றாக சுத்தப்படுத்தி கலசம் தயார் செய்து கொள்ளவும். வெண்கலம் அல்லது வெள்ளிச் செம்பின் உள்ளே பச்சரிசி, காது ஓலை, கருகமணி, காசுகள், எழுமிச்சை பழம் ஆகியவற்றை வைத்து மஞ்சள் தடவிய தேங்காயால் வாயை மூடி நான்கு புறமும் மாவிலையை சொருகிவைக்கவும், சந்தனத்தை தேங்காயில் வைத்து அம்மன் முகத்தை பதிக்கலாம். அப்படி உருவம் இல்லாதோர் சந்தனத்தால் அம்மன் உருவம் செய்துகொள்ள வேண்டும். அல்லது சிலையை கலசத்திற்கு பக்கத்தில் வைக்கலாம். தலைவாழை இலையை சுத்தம் செய்து அதில் பச்சரிசி அல்லது நெல்லைப் பரப்பி அதன்மீது கலசத்தையும் சிலையையும் வைக்கவும். அன்னையை சிறப்பாக அலங்கரிக்கவும். அம்மன் கலசத்தின்முன் ஒன்பது (புகழ், அன்பு, கல்வி, செல்வம், வீரம், ஆரோக்கியம், சந்தான பாக்யம், வெற்றி இவைகளுடன் ஒன்பதாவது இழை மகாவிஷ்ணுவை குறிப்பதாகும்) இழைகள் கொண்ட நோன்புச் சரடுகளை வைக்கவும். அப்பம், பாயசம், கொழுக்கட்டை ஆகிய இனிப்பு வகைகளும், சுண்டல், போன்ற உப்பு பண்டங்களும் அன்னைக்கு படையலில் வைக்க தயாரித்து பாதுகாப்பாக வைக்கவும்.

அடுத்தநாள் வெள்ளிக்கிழமை காலை தலைக்கு குளித்து 1030-1200 மணி வரை ராகுகாலத்திற்குமுன் அம்மனை ‘மகாலட்சுமி தாயே! வரங்களைத் தரும் வரலட்சுமி எனப் புகழப்படும் தாயே எங்கள் இல்லத்திற்கு எழுந்தருள்வாய்’ என மெல்லிய குரலில் சொல்லி அழைத்து ஆரத்தி காட்ட வேண்டும். அர்ச்சனைக்குத் தேவையான் பூக்கள், குங்குமம் ஆகியவற்றைத் தயாராக வைக்கவும்.

மஞ்சளில் பிள்ளையாரைப் பிடித்து குங்கும் வைத்து பூஜை நல்லமுறையில் நடக்க வழிபட வேண்டும் வில்வம், துளசி, உதிரிப் பூக்கள் கொண்டு அன்னையை அர்ச்சனை செய்யவும். அம்மனை கிழக்கு நோக்கி வைத்து பூஜை செய்பவர்கள் வடக்கு நோக்கி அமர்ந்து பூஜை செய்யவும். அம்மனின் நூற்றியெட்டு நாமாவளி- பெயர்களைச் சொல்லி பூக்கள் / குங்குமத்தைப் அன்னையின் பாதத்தில் போடவும் மகாலட்சுமி அஷ்டோத்திரம், கனகதாரா தோத்திரம் தெரிந்தவர்கள் பாடலாம். இசைத் தட்டுகளை இயக்கியும் கேட்கலாம். நிவேதனங்களை நீர் சுற்றி படைத்து சிறு கண்ணாடியை கொண்டுவந்து அம்மனுக்கு காட்ட வேண்டும். தெரிந்தவர்கள் வரலட்சுமி கதையைப் படிக்கவும். தசாங்கம், ஊதுபத்தி, சாம்பிராணி ஏற்றி கற்பூரம் காட்டி தீப ஆராதனை செய்து பூஜை முடித்து பெரியவர்களிலிருந்து ஆரம்பித்து சரடு கட்டி விட வேண்டும். பின்னர் பிரசாதம் வழங்க வேண்டும். ரவிக்கை போன்ற வஸ்திரங்கள் தானம் செய்யலாம். மதியம் உறங்காமல் இருந்து மாலையில் பாடல்பாடி தீப ஆராதனை செய்ய வேண்டும்.

புனர் பூஜை: மறுநாள் சனிக்கிழமை காலை குளித்து அன்னைக்கு பூவிட்டு வணங்கி கற்பூரம் ஆராதனை காண்பித்து கலசத்தை இடப்புறமாக நகர்த்திவிட்டு பூக்களையும் மஞ்சள் பிள்ளையாரையும் நீர் நிலைகளில் கரைக்க வேண்டும். அல்லது கால்படாத இடங்களில் வைக்கவும். கலச அரிசியை பொங்கல் செய்யவும். காசுகள், காதோலை, கருகமணி ஆகியவற்றை சுத்தம் செய்து பாதுகாப்பாக அடுத்த முறை பயன் படுத்த வைக்கவும். தாயே உன் அருளால் விரதத்தை நல்ல படியாக முடித்து விட்டேன். இதே போன்று வருடா வருடம் எந்த தடங்களுமின்றி இப்பூஜை நடைபெற அருள வேண்டும் என வேண்டி அம்மன் சிலை அல்லது முகம், நகைகள் ஆகியவற்றை எடுத்து சுத்தம் செய்து பத்திரமாக வைக்கவும். பிறகு வழக்கம்போல் உணவு உண்ணலாம்.

குறிப்பிட்ட நாளில் பூஜை செய்ய வசதிபடா நிலையில் உள்ள பெண்கள் வீட்டல் உள்ள ஆண்களைக் கொண்டு ஒரு தேங்காயை எடுத்து பத்திரமாக வைக்கச் சொல்லிவிட்டு பின் தொடரும் திங்கள் அல்லது செவ்வாய் கிழமைகளில் எடுத்து வைக்கப்பட்ட தேங்காயை கலசத்திற்குப் பயன் படுத்தி விரதம் இருந்து பூஜிக்கலாம்.

மகாலட்சுமியை வணங்கும் முறை!
தேவியின் திருப்பாதங்களை மனதில் வைத்து தியானைத்தாள் மோட்சம்,
தேவியை மடிமீது வைத்து குழந்தையாய் தியானித்தால்- தனபாக்கியம்
தேவியை மனதில் வைத்து தியானித்தால்- குழந்தைச் செல்வம்
தேவியை இதயத்தில் வைத்து தியானித்தால்- காரியசித்தி
தேவியை கழுத்தில் வைத்து தியானித்தால்- ரத்ண ஆபரணங்கள்
தேவியை தலையில் வைத்து தியானித்தால்- உதறித் தள்ளுவாள்

ராஜலட்சுமி சபை!
தொழில் முன்னேற்றம், செல்வச் செழிப்பு, தானிய விருத்தி,சந்தான பாக்யம், மனதில் தைரியம், வெற்றிகள் கிட்டும் இல்லத்திலும் மனதிலும் மங்களங்கள் தங்க இந்த அஷ்டலட்சுமிகளும் ஒரே இடத்தில் இருக்க வேண்டும். அந்த இடமே ராஜலட்சுமி சபை.
கஜலட்சுமி, வீர லட்சுமி, சந்தான லட்சுமி, விஜய லட்சுமி, தான்ய லட்சுமி, வித்யா லட்சுமி, தன லட்சுமி, தைரிய லட்சுமி,

#####

ஞாயிற்றுக்கிழமை, 15 July 2018 12:17

கல்கி அவதாரம்!

ஓம்நமசிவய!

யானை முகத்தான் பொருவிடையான்சேய் அழகார்
மான மணிவண்ணன் மாமருகன் மேனிமுகம்
வெள்ளக் குமிழி மதத்து விநாயகன் என்
உள்ளக் கருத்தின் உளன்!

####

கல்கி அவதாரம்!

எல்லா கிரக தோஷங்களையும் நீக்கும். கலியுக அவதார புருஷர்.

விஷ்ணுவின் கல்கி அவதாரத்திற்கு உகந்த அரிய சக்தியை அபரிதமாக வழங்குபவள் திரிபுர சுந்தரி

#####

ஞாயிற்றுக்கிழமை, 15 July 2018 12:14

பலராம அவதாரம்!

ஓம்நமசிவய!

முன்னவனே! யானை முகத்தவனே! முத்திநலம்
சொன்னவனே! தூய மெய்ச் சுகத்தவனே!
மன்னவனே! சிற்பரனே! ஐங்கரனே!
செஞ்சடையஞ் சேகரனே! தற்பரனே! நின்தாள் சரண்!

####


பலராம அவதாரம்!

விஷ்ணுவும் ஆதிசேஷனும் ஒரே சமயத்தில் அண்ணனாகவும் தம்பியாகவும் பிறப்பு எடுத்தது.

பாரத போரில் எந்தப் பக்கமும் சேரமுடியாத தர்மசங்கடமான நிலையில் போர் நடைபெறும்போது பலராமர் தீர்த்த யாத்திரை மேற்கொண்டார். நைமிசரண்யம் சென்ற போது சூதமுனிவரைத்தவிர மற்றவர் மரியாதை செலுத்த சூதமுனிமேல் கோபங்கொண்ட பலராமர் ஓர் தர்ப்பையை எடுத்து மந்திரித்து ஏவ அது சூதரைக் கொல்ல, பலராமரால் கொல்லப் பட்டதால் சூதர் பிரம்மலோகம் சென்றார். பலராமரை பிரமஹத்தி தோஷம் பற்ற மானிட பிறப்பு எடுத்த அனைவரும் உலக நியதிக்கு கட்டுப் பட்டவர் என்பதற்காக தமது தோஷ பரிகாரத்திற்கு பன்னிரண்டு ஆண்டுகள் தீர்த்த யாத்திரை தொடர்ந்தார்.

இந்த பலராமர் தரிசனம் –குளிகன் தோஷம் நீக்கும். பெரும்பாலான திருத்தலங்களில் தசாவதாரச் சன்னதிகளில்.

#####

ஞாயிற்றுக்கிழமை, 15 July 2018 11:48

கிருஷ்ண அவதாரம்!

ஓம்நமசிவய!

அல்லல்போம், வல்வினைபோம், அன்னை வயிற்றில்
பிறந்த தொல்லை போம், போகாத் துயரம் போம்,
நல்ல குணமதிகமாம் அருணை கோபுரத்துள் மேவும்
கணபதியைக் கைதொழுதக் கால்!

####


கிருஷ்ண அவதாரம்!

ஆகாது எனச் சொல்லும் அஷ்டமி திதியை. நல்ல காரியத்திலிருந்து விலக்கிவிடுவர். இதனால் வருந்திய அந்த திதி தேவதையின் வேண்டுகோளுக்கிணங்கி கிருஷ்ணாவதாரம் அஷ்டமியில் நடக்க அது கோகுலாஷ்டமி என சிறப்புற்றது. இறை நம்பிக்கை கொண்டு வழிபட்டால் ஆகாதது என்றில்லை எதுவும் இப்பூமியில்.

கண்ணன் என்ற இந்த அவதாரமே பிறக்குமுன்னே தன்னை வெளிப்படுத்திய அவதாரம். எட்டாவது குழந்தையைக் கொல்லத் தயாராக இருக்கும் கம்சனைப் பற்றிக் கவலையுடன் இருக்கும் பெற்றோர்களுக்கு தன்னைக் பற்றியும் அவர்கள் என்ன செய்யவேண்டும் என்பதை பிறக்குமுன் தன் மாயையால் உணர்த்தினார். வாசுதேவர் பயணிக்க சிறைக்கதவுகளை திறந்துவிட்டு யமுனையை வழிவிடச்செய்தார். அன்னை தேவகியாக இருந்தாலும் யசோதையிடம் வளர்ந்தார்.

காசியில் தவம் செய்துவந்த புலஸ்தியமுனிவர் துரோணாசலன் என்ற மலையரசனின் மகன் கோவர்த்தனை தன்னிடம் அளிக்குமாறு கேட்க மகனை பிரிய மனமில்லா நிலையில் தந்தையிருக்க மகனோ ஒரு நிபந்தனையுடன் புலஸ்திய முனிவருடன் செல்லத் தயாரானான். முதலில் எங்கே இறங்கி விடுகின்றாரோ அங்கேயே நான் தங்கி விடுவேன் என்றான். விரிஜா மண்டலத்தைக் கடந்த சென்று கொண்டிருந்தபோது ஓர் இடத்தில் கோவர்த்தனை வைத்துவிட்டு நீராடச் சென்றார். திரும்பி வந்து கோவர்த்தனைத் தூக்க அவரால் அவனை அசைக்கக்கூட முடியவில்லை. பெரும் மலையாக மாறினான் கோவர்த்தன். கோபம் கொண்ட புலஸ்தியர் ஒவ்வொரு நாளும் கடுகளவு பூமிக்குள் சென்று இறுதியில் மலை முழுவதும் பூமியில் புதைய சாபமிட்டார். சாபத்தின் பலனாக சிறிது சிறிதாக குறைந்து சிறிய மலையானது.

விரஜா மண்டலத்தைச் சேர்ந்த ஆயர்பாடி மக்கள் கிருஷ்ணனைக் கொண்டாடி மகிழ்வதில் காலத்தைக் கடத்தினர். அதனால் இந்திர விழாவைக் கொண்டாடவில்லை. இது இந்திரனுக்கு வருத்தத்தை அளித்தது. மழைக்கு அதிபதியாகிய இந்திரன் கோபத்தினால் பேய்மழை ஏழு நாட்கள் தொடர்ந்து பொழிய வைக்க ஆயர்பாடி மக்கள் வீடிழந்து பயிர் பச்சைகள் அழிய அடை மழையால் நிற்க இடமின்றி தவித்தனர். மக்கள் மழையால் அவதியுறுவதைக் கண்ட கிருஷ்ணன் அருகிலிருந்த கோவர்த்தன் மலையைத் தூக்கி தன் ஒற்றை விரலால் குடையாய் பிடிக்க மக்கள், பசுக்கள் மற்றும் சகல ஜீவன்களும் அதன் கீழ் பத்திரமாய் தங்கினர்.

இந்திரன் கிருஷ்ணரின் பெருமையறிந்து மன்னிப்பு வேண்டினான். மக்கள் தங்களை காத்திட்ட கிருஷ்ணனையும் கோவர்த்தன் மலையையும் வணங்கினார்கள். விரஜா வாசிகள் கோவர்த்தன் மலைக்கு நைவேத்தியம் ஆரத்தி எடுத்து விமரிசையான பூஜை-அன்னகூடபூஜை செய்தனர். கிருஷ்ணருக்கு ‘கோவர்த்தன கிரிதன்’ என்றும் கிரிதரகோபலன் என்றும் பெயர் ஏற்பட்டது. பர்ஸானாவிலிருந்து 21 கி.மி. கோவர்த்தன் மலையை வழிபடும் கோவில்- கிரிராஜ்தான்கடி

இருக்கும் நீர் நிலையை மக்கள் பயன்படுத்த முடியாவகையில் செயல்பட்ட காளிந்தி பாம்பின் மீது தன் கால்பதித்து அதன் அகந்தை அகற்றியதால் ஞானம் பிறந்த காளிந்திக்கு அவன் நஞ்சை நீக்கி அபயம் அளித்து மக்கள் நீரை உபயோக்க உதவி செய்தார்.

வஞ்சகமாக தன்னை அழிக்க நினைத்த அரக்கர்களான சகடாசூரனையும், பூதகியையும் கொன்றார்.

வேதங்கள், சாஸ்திரம், புராணங்கள், இதிகாசங்கள், சம்பிரதாயம், பண்பாடு எல்லாம் ஆத்மவின் உடல் உள்ளம் இரண்டையும் தூய்மையாக்கும் நல்லுரைகளை வழங்குபவை. எத்தனை உயிர்கள் அவற்றை சரியாகப் பின்பற்றுகின்றோம். கலியுகத்தில் உயிர்கள் அவைகளை விட்டு விலகிச் சென்று கொண்டிருக்கின்றோம். விஞ்ஞானத்தால் ஆடம்பர வாழ்கை முறைகளை தன் வாழ்க்கையில் புகுத்திக் கொண்டாலும் துன்பம் நேரிடும்போது ஆத்மா வேதங்களின் பாதையில் செல்ல விழைகின்றது.

குளம், குட்டை, ஆறுகளில் சிறுநீர் மலம் கழித்தல் தவறு, ஆடையில்லாமல் நீர் நிலைகளில் நீராடாதே. இது வேதம் சொல்வது.

ஊனக் கண்களினால் ஊனத்தை பார்க்கும் நாம் அறிவுக் கண்ணால் ஞானத்தைப் பார்க்க வேண்டும்.

நீர் வாழ் இனங்கள் நச்சுப் பிராணிகள் நமது உடல் உறுப்புகளை தீண்ட வாய்ப்புண்டு. அது அந்த உயிர்க்கு ஊறு விளைவிக்கும். இதை உணர்த்தவே ஆடைகளின்றி நீரில் குளித்துக் கொண்டிருந்த கோபியர்களின் ஆடையை ஒளித்து வைத்து கண்ணன் நடத்திய நிகழ்வு. தலைக்குமேல் கைகூப்பி வணங்க வேண்டி நிலை ஏற்பட்டதை கோபியர்கள் மறக்கமாட்டார்கள். இன்னொரு முறை ஆடைகளை களைந்து நீராட மனம் விரும்பாது. தண்டனையாக வேதத்தை போதித்தார் கண்ணன். ஆனால் அது கண்ணனின் லீலையாக கருதப்பட்டு விட்டது.

கம்சனை அழிக்கும் காலம் வரும்வரை கோகுலத்தில் கண்ணனாக வாழ்ந்தவர் மதுராவில் மக்களின் துயர் தீர்க்க தந்தையைச் சிறையிட்டு தானே முடிசூடிக்கொண்ட கம்சனைக் கொன்று உக்கிரசேன மகாராஜாவை சிறையிலிருந்து விடுவித்து அவர் ஆசியுடன் மதுரா மன்னனார்.

போரில் மக்களின் உயிர்கள் அழிவதால் ஏற்படும் இன்னல்களைத் தடுக்க கடலின் நடுவில் துவாரகையை அமைத்து ஜராசந்தனுடன் போரிடும் முறையை மாற்றினார். சமயம் வரும்போது விவேகமாக இருப்பதும் வீரம் என்பதை தன் செயலால் உணர்த்தியவர்.

ருக்மணியை சிசுபாலனுக்கு மணமுடிக்க இருந்த நிலையில் தன்மனதில் குடியிருந்த கண்ணனை, குலதெய்வம் கோயிலுக்கு தான் வரும்பேது கடத்திசென்று மணம்புரிய காதல் கடிதம் எழுத அவ்வாறே கண்ணன் மணமுடித்து துவாரகையின் மாடவீதிகளில் செல்ல அனைவரும் வணங்க உலகாளும் மன்னனை அடைந்தோம் என ஆணவம் கொண்டாள் ருக்மணி. அப்போது துர்வாசமகரிஷி அங்குவர தான் அமர்ந்த தேரை கண்ணனும் ருக்மணியும் இழுக்க விரும்ப, உடல் உழைத்திராத ருக்மணி நாவரண்டு சிரமப்பட கண்ணன் நிலத்தை கீர கங்கை தோன்ற தாகம் தீர்த்த ருக்மணியை, அதிதியான என்னை கவனியாமல் உன் கணவன் இறைவன் என்ற இருமாப்பில் என்னை அவமதித்தாய் என்று கோபமடைந்து கணவனுடன் 12 ஆண்டுகள் இனைந்துவாழ இயலாது என சாபம். கண்ணன் ருக்மணியிடம் அகங்காரம் கொள்ளாதே ஆடம்பரத்திற்கு அடிபணியாதே என ஆறுதல்

ருக்மணியிட்ம் மறுகரையில் இருக்கும் துர்வாசமுனிவரிடம் நிவேதனப் பொருளை கொடுத்துவரச் சொன்னார் கிருஷ்ணர். வெள்ளம் அதிகமாக இருக்க திகைத்த ருக்மணியிடம் ‘கண்ணன் நித்யபிரம்மச்சாரி என்பது உண்மையானால் நதியே வழிவிடு’ எனக் கண்ணன் கூறிவாறு சொல்லி ஆற்றைக் கடந்தாள். துர்வாசரிடம் நிவேதனப் பொருளைக் கொடுத்து திரும்பும்போது நதியைக் கடக்க துர்வாசர் கூறியபடி, ‘துர்வாசர் நித்ய உபவாசி என்பது உண்மையானால் நதியே வழிவிடு’ எனக்கூறி நதியைக் கடந்தாள்.

திரும்பி வந்தவள் கண்ணனைப் பார்த்து, என்னுடன் குடும்பம் நடத்தும் நீங்கள் நித்ய பிரம்மச்சாரி என்கிறீர்கள், நான் கொடுத்ததை உண்டுவிட்டு துர்வாசர் நித்ய உபவாசி என்கிறார் இது எப்படி சரி என்று கேட்க, கண்ணன், ‘எங்கள் இருவருக்கும் எதன் மீதும் பற்று இல்லை. அதனால் இல்லறத்தில் இருந்தாலும் நான் பிரம்மச்சாரி, நீ அளித்ததை உண்டாலும் துர்வாசர் உபவாசி என்றார். பற்று இன்றி, அனைத்தும் இறைவனது என எண்ணி வாழ்ந்தால், வாழ்க்கை பயணம் ஆனந்தமும் அமைதியும் நிறைந்ததாக இருக்கும் என்பதை ருக்மணிக்கு புரிய வைத்தார்.

நாட்டில் தர்மம் நிலைக்க பாண்டவர்கள் வெற்றி அவசியம் என்பதற்காக பல செயல்கள் நடைபெற்றது. அந்த செயல்கள் எல்லாம் நடைபெறவில்லையாயின் பாண்டவர்களுக்கு வெற்றி என்பது நிச்சயமாக கிடையாது. அந்த வெற்றிக்காக முன்கூட்டியே நடந்த செயல்கள் ஒவ்வொன்றிற்கும் இறையின் ஆலோசனை, அரவனைப்பு இருந்து கொண்டிருந்ததுதான் நிதர்சனம். சதுரங்கத்தில் வெற்றி பெற சதுரங்க காய்கள் எப்படி நகர்த்தப் படுகின்றதோ அதைப் போன்றே பாண்டவர்கள் வெற்றிக்காக முன்கூட்டியே திட்டமிட்ட பல நிகழ்வுகள் நடத்தப்பட்டன. எதிரி எவ்வளவு பல சாலியாகவும் சக்தி மிக்கவராக இருப்பினும் தர்மம் வெல்ல வேண்டும் என்பதற்காக விஷ்ணுவாகிய பெருமாள் கிருஷ்ண அவதாரமெடுத்து தர்மத்தை நிலைநாட்ட பல நிகழ்வுகளை தர்மத்துக்கு சாதகமாக்கி பாண்டவர்கள் வெற்றிபெற உதவியாகயிருந்த அந்த நிகழ்வுகளை அனைவரும் அறிவோம்!

பண்டவர்கள் இறையருள் நிறைந்தவர்கள். அடக்கம், வாய்மை பண்புகளைக் கொண்டிருந்த வீரர்களான அவர்களுக்கு இறுதிவரை எல்லா நிலைகளிலும் உதவி செய்தார் கிருஷ்ணர். காண்டவ பிரஸ்தமாக இருந்த முள்வனத்தை மனம் தளராமல் உழைக்க வைத்து அழகிய இந்திரபிரஸ்தமாக மாற்ற உதவினார்.

சூதாட்டம் கண்ணனுக்கு தெரியக்கூடாது என தர்மர் நினைத்ததால் கிருஷ்ணர் அங்கு வரவில்லை. தர்மரின் அந்த நினைவே பாண்டவர்கள் சூதாட்டத்தில் அனைத்தையும் இழந்து பாஞ்சாலியையும் இழந்தனர். அவையில் பாஞ்சாலி துகிலுரியப்படும்போது பீஷ்மர், துரோணர், கிருபாச்சாரியார் ஆகியோர் தம் கண்களைத்தான் மூடிக் கொண்டார்களேயன்றி முழுவதுமாக அந்த அநியாயத்தை எதிர்க்கவில்லை.

கண்ணா அபயம் என்று பாஞ்சாலி சரணடைந்ததும் சேலையை அனந்தம்- (அளவின்மை, அளவில்லாதவை) என்ற எல்லையில்லாமல் வளரச் செய்து திரௌபதியான பாஞ்சாலிக்கு கருணை காட்டினார். காட்டில் பாண்டவர்களின் பசியைப் போக்க அட்சயப்பாத்திரத்தை சூரியனிடமிருந்து பெற உதவினார். வனத்தில் கோபத்திற்குரியவரான துர்வாசரால் பாண்டவர்களுக்கு துன்பம் விளைவிக்க சகுனி முயற்சித்தபோது அட்சயப் பாத்திரத்தில் ஒட்டியிருந்த ஒர் பருக்கையை உண்டு துர்வாசரின் பசிபோக்கி பாண்டவர்களைக் காப்பாற்றினார்.

பஞ்சபாண்டவர்கள் வனவாசத்திற்காக கூகூர்-திருச்சேறை அருகில் வந்தபோது ஒரு மாமரத்தில் மாங்கனி இருப்பதைக் கண்ட பாஞ்சாலி அதைக் கேட்க ஒவ்வொருவராக முயற்சித்தும் மரம் அசையவில்லை. பின் ஐவரும் ஒன்று சேர்ந்து உலுக்க பழம் கீழே விழ அதை பாஞ்சாலியிடம் கொடுக்க அப்போது அங்கே வந்த முனிவர், இந்த மரத்தில் 12 ஆண்டுகளுக்கு ஒருமுறை மட்டுமே ஒரு மாங்கனி காய்க்கும். துர்வாசர் வந்துகேட்டால் மாங்கனி அவர் மடியில் விழும். அதனால் இந்தப் பழத்தை மரத்திலேயே வைத்துவிடு என்று கூறிச் சென்றார். இப்படிச் சிறப்பு வாய்ந்த மாங்கனியை எப்படி மீண்டும் மரத்தில் சேர்ப்பது என நினைத்து கிருஷ்ணரிடம் வேண்ட அவர் கணியை மரத்தின் கீழ் வைத்து விட்டு அவரவர் மனதில் இருக்கும் உண்மையான தகவலைக் கூறக் கூற கனி சிறிது சிறிதாக உயர்ந்து மேலே சொல்லும் தவறாக தகவல் கொடுத்தால் அப்படியே நின்று விடும் என்றார். அதன்படி ஒவ்வொருவரும் ஒரு உண்மைத் தகவலைச் சொல்ல கணி உயர்ந்து மரத்தில் ஒட்டிக் கொண்டது. ஆம்பரம்-மாமரங்கள் நிறைந்த இடம்-ஆம்பரவனேஸ்வரர். பண்டவர்கள் வழிபட்டது. ஆதித்த சோழனால் கட்டப்பட்டது- ஆதித்தேசுவரம்- இறைவன் ஆதித்தேசுவரர். துர்க்கையின் கரத்தில் கிளி.-கூகூர்-திருச்சேறை அருகில்

இருபத்தெட்டாவது சதுர்யுக துவாபரயுகத்தில் நரநாராயணர்களே கிருஷ்ணனும் அர்ஜுனனும் எனப் பிறந்தார்கள் என்கிறது பாகவதம். அர்ஜுனன் எல்லா நிலையிலும் கிருஷ்ணரின் ஆலோசனையின் பேரிலேயே செயல் பட்டு வெற்றிகளைப் பெற்றான். பாசுபத அஸ்திரம்பெற வழிவகைகளைச் சொல்லி அர்ஜுனன் அதை அடைவதற்கும் சுபத்திரை திருமணம் முதல் அனைத்தும் கிருஷ்ணரின் உதவியுடன்தான் நடந்தேறீயது.

ஆயுதம் தாங்காமல் யுத்தத்தின்போது அர்ஜுனனின் தேரோட்டியாக அமர்ந்து நாகாஸ்திரத்திலிருந்து அர்ஜுனனை காப்பாறினார். பூமியில் பிறந்த ஒவ்வொரு உயிரும் தங்கள் கடமையை எப்படி செய்ய வேண்டும் என்பதை வழிகாட்ட வேண்டியதுதான் இறைபணி என்பதை உணார்த்தவே கிருஷ்ணர் சாரதியாக தேரோட்டியாக செயல் பட்டார்.

ஒவ்வொரு உயிரும் எந்த நல்ல தர்ம செயல்களாக இருந்தாலும் தம்மால் இயன்ற அனைத்து முயற்சிகளையும் செய்துவிட்டு இனி எல்லாம் உன் செயல் என்று சொல்லும் பக்குவத்தை அடையவேண்டும். கடமையைச் செய் பலனை எதிர்பார்க்காதே, என்னிடம் விட்டுவிடு என்பதை உணர்த்தவே பாரதபோரின்போது உலகப் புகழ் பெற்ற கீதா உபதேசம் நடைபெற்றது.

சத்யபாமாவிற்கு தான் அழகு என்பதில் கர்வம்! விஷ்ணுவின் சக்ரத்திற்கு இந்திரனின் வஜ்ராயுதத்தை துளாக்கியதால் தானே பலசாலி என்று கர்வம்! தன்னைவிட வேகமாகப் பறக்க யாராலும் முடியாது என்று கருடனுக்கு கர்வம்! இவர்களின் கர்வத்தை நீக்க நினைத்த கிருஷ்ணர்,

துவாரகா எல்லையில் உள்ள ஒரு தோட்டத்திற்கு அனுமனை வரச் சொன்னார். கருடனிடம் சிறுபடை ஒன்றை கொண்டு நகரின் எல்லையில் உள்ள தோட்டத்தில் அட்டகாசம் செய்யும் அந்த வானரத்தை பிடித்துவரச் சொன்னார். வனரத்தைப் பிடிக்க படையா என்று நினைத்து தனியே சென்ற கருடன் எவ்வளவு முயன்றும் வானரத்தை பிடிக்க முடியவில்லை. கிருஷ்ணரிடம் சென்று சொல்ல, ஸ்ரீராமன் அழைப்பதாகச் சொல், வருவார் என்றார்.

ஸ்ரீராமர் அழைக்கின்றார் என்று சொன்னவுடன் பரவசமான அனுமன் கருடனை முன்னே போகச் சொல்ல, கருடன் நான் உன்னை விரைவாக தூக்கிச் சென்று விடுகின்றேன் என்று சொன்னதை வானரம் மறுக்க, கருடன் பறந்து கிருஷ்ணர் இருக்குமிடம் செல்ல ஆரம்பித்தார். தனது சக்கரத்திடம் யாரும் துவரகா எல்லைக்குள் வரமால் பார்த்துக்கொள் என்று சொல்ல வானரம் வருவதை அறிந்த சக்கரம் வானரத்தைத் தடுக்க அந்தச் சக்கரத்தை தனது கையால் பிடித்து வாயில் போட்டுக் கொண்டார் அனுமன்.

சத்யபாமாவை சீதைபோல் உருவம்தாங்கி அலங்காரத்துடன் வரச் சொன்னார். அனுமனின் வருகையை எதிர்பார்த்து இராமர் கோலத்தில் கிருஷ்ணர் இருக்க அருகில் அலங்காரமாய் பாமா இருக்க அனுமன் ஸ்ரீராமரை வணங்கிவிட்டு சீதைபோலிருக்கும் அருகிலிருந்த பாமாவை வணங்கப் போனவன் பாமாவைக் கண்டு கோபம் கொண்டான். என் அன்னை எங்கே! அலங்கோலமாக இருக்கும் இந்தப் பெண் யார்! என்று அனுமன் கேட்க, கிருஷ்ணர் ஒன்றும் பேசாமல் அமைதியாக இருக்க, குனிந்த தலை நிமிராமல் இருந்த பாமாவின் தான் அழகு என்ற கர்வம் தூளாகி உடைந்தது. சீதையை அழகியா என நினைத்த தம்மை இந்த வானரம்கூட தான் அழகை அறியவில்லை என்றால், கணவனே தெய்வம் என்று வாழ்ந்த சீதையின் அழகைவிட தான் அழகில்லை என்று நினைத்தாள். அவளின் கர்வம் அடங்கியது.

ஸ்ரீராமர் உருவில் இருந்த கிருஷ்ணர் அனுமனை நோக்கி உன்னை யாரும் தடுக்க வில்லையா என்று கேட்டபோது தன் வாயிலிருந்து சக்ரத்தை எடுத்து வெளியேவிட்டார். ஒளி இழந்து மங்கிய நிலையடைந்திருந்த சக்ரம் தன் நிலை உணர்ந்து கர்வத்தை விட்டது.

வேகமாக வந்த கருடன் தனக்குமுன் அங்கு வானரம் இருக்கக் கண்டவுடன் தன்னை விட வேகமாக பறக்க ஒருவரால் முடியும் என்று அறிந்ததும் கருடன் கர்வம் அடங்கியது.

கிருஷ்ணரின் மனைவியரில் சத்யபாமாவிற்கு ருக்மணியைவிட தனக்குத்தான் அளவு கடந்த அன்பு உள்ளது என்று கர்வத்துடன் நினைத்திருந்தாள். கர்வம் கலந்த அன்பு தன் உயர் நிலையை இழந்து விடுகின்றது என்பதை சத்யபாமாவிற்கு புரிய வைக்க இருவருக்கும் ஒரு போட்டியை வைத்தார்.

துலாபாரத்தில் ஒரு தட்டில் அமர்ந்து கொண்டார். துலாபாரத்தை வைத்து அன்பை எடைபோடுவது என்றானதும் சத்யபாமா தன்னிடம் உள்ள பொன், வைரம், வைடூரியம், மாணிக்கம் என்று விலை உயர்ந்த பொருட்களை எல்லாம் சத்யபாமா கொண்டுவந்து வைத்தாள். எவ்வளவு வைத்தும் தட்டு சிறிதளவுகூட உயரவில்லை.

அடுத்ததாக அவற்றையெல்லாம் எடுத்துவிட்டு ருக்மணியின் முறை வந்தபோது அவள் தன்னைவிட உயர்ந்த பொருட்கள் எதை வைக்கின்றாள் என்று சத்யபாமாவும் மற்றவர்களும் ஆவலுடன் பார்த்துக் கொண்டிருக்க ருக்மணி கிருஷ்ணரை வணங்கி தோட்டத்திற்குச் சொன்று சிறிது துளசி இலைகளைக் கொண்டுவந்து வைத்தாள். உடன் துலாபாரம் உயர்ந்தது. சத்யபாமா அப்போது தன் அன்பில் கர்வம் குடியிருப்பதை உணர்ந்தாள். தூய அன்பு மற்றும் துளசியின் பெருமை இதனால் உணரப்பட்டது.

கிருஷ்ணபக்தி யாரிடம் அதிகமாக இருக்கின்றது என்பதை அறிய எண்ணிய கிருஷ்ணன் தனக்கு தலைவலி எனச் சொன்னார். அந்த தலைவலி போகவே இல்லை. அங்கு வந்த ரிஷி நாரதர் உண்மையை உணர்ந்து கிருஷ்ணரிடம் உண்மையான பக்தி கொண்டவrகளின் பாத தூளியை கொண்டுவந்து தடவினால் வலி நீங்கும் என்றார். ருக்மணி சாத்யபாமா இருவரும் பாத தூளியினை பகவான் நெற்றியில் தடவுவதா என மறுத்துவிட்டனர். நாரதர் பிருந்தாவனத்திற்கு ஆட்களை அனுப்ப அங்கிருந்த கோபியர்கள் அனைவரும் வருத்தமுற்று தங்களின் கால்களில் உள்ள தூளியை சேர்த்து மூட்டையாகக் கட்டி இங்கு அனுப்பினர். அதை தடவியதும் அவர் தலைவலி நின்றது. கோபியரின் மேன்மை அப்போது புரிந்தது.

பிண்டாரக் சேத்திரம் என்ற இடத்திற்கு வந்த விஸ்வாமித்திரர், கண்வர், நாரதர் ஆகிய முனிவர்களை யாதவ குமாரர்கள் கிண்டல் செய்ய ஜாம்பவதியின் மகனான சாம்பனுக்கு பெண்வேடமிட்டு முனிவர்கள் முன் நிறுத்தி இவள் கர்ப்பவதி இவளுக்கு ஆண் குழைந்தையா, பெண் குழைந்தையா எனக் கேட்க உண்மை உணர்ந்த முனிவர்கள் ஓர் உலக்கைப் பிறக்கும். அது உங்கள் குலத்தையே அழிக்கும் என்றனர்.

அப்படியே நடக்க- உலக்கைப் பிறந்தது. பயந்த யாதவர்கள் அந்த இரும்பு உலக்கையை பொடிபொடியாக்கி கடலில் கரைத்தனர். இரும்புத் தூள்கள் கடற்கரையில் வந்து படிந்து நாணல் புதராக வளர்ந்தது. மீதி இருந்த இரும்புத் துண்டை மீன் விழுங்க அந்த மீன் மீனவன் வலையில் அகப்பட அதைக் கொன்றவன் அந்த இரும்புத் துண்டை வீசி எறிய அது ஜரா வேடனின் கையில் கிடைக்க கூர்மையாக இருந்த அந்த இரும்புத்துண்டை அவன் தன் அம்பில் பொருத்திக் கொண்டான்.

விதியின் வேலை சரியாக நடக்க யாதவர்கள் ஒருவருக்கொருவர் சண்டையிட்டு தங்களிடமிருந்த ஆயுதங்கள் எல்லாம் தீர்ந்ததால் கடற்கரையில் உள்ள நாணல் புற்களைப் பிடுங்கி சண்டையிட உலக்கை துகள்கள் பட்டு அனைவரும் இறக்க கடல் வெள்ளம் துவாரகா நகரில் புகுந்து நகரை மூழ்கடித்தது.

கிருஷ்ணர் தான் பூஜித்து வந்த விக்ரகங்களை கடலில் விட்டு தியானத்தில் அமர்ந்தார். கடல் தண்ணீரில் வேடன் ஜரா விட்ட கூரிய அம்பு மிதந்து வந்த கிருஷ்ணரைக் குத்த மானிட சரீரத்தை துறந்து பிரம்ம சொரூபத்தில் ஐக்கியமாகி வைகுண்டம் சென்றார்.

கிருஷ்ணரைப் பிரிந்த துக்கம் தாளாமல் கோபியர்கள் பதினாறாயிரம் பேரும் துவாரகை அருகில் இருந்த குளத்தில் விழுந்து உயிர் துறந்தனர். அவர்கள் உயிர் தியாகம் செய்த குளம் கோபிதலாவ். குளத்தின் பக்கப் பாறைகள் சந்தன மணம் தருகின்றன. உயிரை மாய்த்த கோபியர்கள் சந்தனமாக மாறினர். இந்தக் குளத்தின் மண்ணிலிருந்துதான் கோபி சந்தனம் தயாரிக்கப்படுகின்றது. துவாரகை-கோபிதலாவ்

பலகாலங்கழித்து கேரளக் கடற்கரையில் வலை வீசிய மீனவன் கையில் ராமர், லட்சுமணர், பரதர், சத்ருக்கணன், ஆகிய நான்கு விக்ரகங்களும் கிடைத்தன. சிற்றரசன் வாய்க்கல்கைமள் என்பவனிடம் ஒப்படைக்கபட்ட விக்கரகங்கள் ஒவ்வோர் இடத்தில் பிரதிஷ்டை. இராமர் விக்ரகம் திருப்பரையாரில் பிரதிஷ்டை. லட்சுமணன்- திருமூழிக்களம், பரதன்- கூடல் மாணிக்கத்தில், சத்ருக்கனன்-பாயமேயில் எனப் பிரதிஷ்டை. திருப்பரையார்-கேரளா

விஷ்ணுவின் கிருஷ்ணாவதாரத்திற்கு உகந்த அரிய சக்தியை அபரிதமாக வழங்கியவள் காளி.

ஸ்ரீ கிருஷ்ணனை வழிபட்டால் சந்திர தோஷம் நீங்கும் எண்ணற்ற கோவில்கள் உள்ளன

#####

ஞாயிற்றுக்கிழமை, 15 July 2018 11:29

ராம அவதாரம்!

ஓம்நமசிவய!

மண்ணுல கத்தினிற் பிறவி மாசற
எண்ணிய பொருளெலாம் எளிதின் முற்றுறக்
கண்ணுதல் உடையதோர் களிற்றுமா முகப்
பண்ணவன் மலரடி பணிந்து போற்றுவோம்!

####

ராம அவதாரம்!

ஆகாது எனச் சொல்லும் நவமி திதியை. நல்ல காரியத்திலிருந்து விலக்கிவிடுவர். இதனால் வருந்திய அந்த திதி தேவதையின் வேண்டு கோளுக்கிணங்கி இராமவதாரம் நவமியில் நடந்து ஸ்ரீராமநவமி எனப் புகழ்பெற்றது. இறை நம்பிக்கை கொண்டு வழிபட்டால் ஆகாதது என்றில்லை எதுவும் இப்பூமியில். ராமர் திரேத யுகத்தில் ரகுவம்சத்தில் உத்தராயணத்தில் சித்திரை மாதம் சுக்லபஷ நவமிதிதியில் புனர்பூச நட்சத்திரத்தில் சிம்ம லக்னத்தில் அவதரித்தார். அந்த நாளே ஸ்ரீராமநவமி எனப்படும்.

ஆறுவது சினம் என்றார் ஒளவையார். சினம் சேர்ந்தாரைக் கொல்லும் என்றார் வள்ளுவர். எரிகிறதைப் பிடுங்கினால் கொதிக்கிறது அடங்கும் என்றனர் பெரியோர். கோபம் செல்லுமிடம் செல்லாத இடம் இரண்டிலும் கோபம் கொடியதே! தீமை விளைவிக்கும். சூர்பணகை செயலால் இலக்குமணன் கொண்ட கோபம் செல்லக் கூடிய கோபம். மூக்கிழந்த சூர்பணகையைக் கண்டு இராவணன் கொண்டது செல்லாத இடத்தில் நிகழ்ந்துவிட்டது. அதனால் எத்தனைபேருக்குத் துன்பம்.

இராமன் கோபம் கொண்டிருந்து கைகேயின் ஆனையை மீறி நடந்திருந்தால் இராமயணம் என்ற இதிகாசமும் ஸ்ரீ ராமசந்திர மூர்த்தி என்ற தியாகர் நமக்கு கிடைத்திருக்காது.

பொறுமையின் அவதாரம் ராமர். ஏக பத்னி விரதன். ராமன் உத்தமன் என்பதால் கல்லாக இருந்த அகலிகை ராமர் காலடி பட்டு சாபம் நீங்கி சுய உருவை அடைந்தாள்.

இராவணனை வதைத்துவிட்டு இராமேஸ்வரம் வந்ததும் ராமர் சிவ பூஜை செய்ய தீர்மானித்து அனுமனை காசிக்கு அனுப்பி லிங்கம் கொண்டுவரச் சொல்லிவிட்டு அவர் வருவதற்குள் சீதை செய்த மணல் லிங்கத்தை வைத்து பூஜையை முடிக்க பின் அனுமன் கொண்டு வந்த லிங்கமும் பிரதிஷ்டை செய்து வழிபடப்பட்டது. இந்தச் சம்பவத்தில் உள்பொருள் ஒன்று மறைந்து கிடக்கின்றது.

சிவபூஜைக்கு அருகில் இருந்தே ஒரு லிங்கத்தைக் கொண்டுவரச் சொல்லி இருக்கலாம். அல்லது சீதை செய்ததைப்போல் தானே ஒரு லிங்கத்தை செய்து வழிபட்டிருக்கலாம். பின் ஏன் அனுமனை காசியிலிருந்து லிங்கம் கொண்டுவரச் சொன்னார்? இராமர்!

இராமர் முதலில் வழிபட நினைத்தது காசி விஸ்வநாதரை. ஈசன் இருப்பிடம் கயிலை என்றாலும் அவர் நிரந்தர வாசம் செய்வது வாரணாசி என்கிற காசியில்தான். விஸ்வம் என்றால் உலகம். அதன் தலைவர் விஸ்வநாதர். மானிடப் பிறவியில் உலகத்தின் தலைவர் விஸ்வநாதரை வழிபட நினைத்தார்.

அடுத்தது எல்லா சமயத்திலும் அஞ்சனை மைந்தன் அனுமனை அருகில் வைத்துக் கொண்ட இராமர் சிவ பூஜையின் போது மட்டும் அவர் தள்ளி யிருக்க நினைத்ததால் காசிக்கு அனுப்பினார். அதற்கு ஓர் காரணம் உண்டு. நம் எல்லோருக்கும் தெரியும் உற்சவர் உலாவரும்போது மூலவரின் சக்திகள் உற்சவரில் அடங்கும். கோவில்களில் உற்சவர் உலாவின் போது மூலவரை திரை போட்டு வைப்பார்கள் தெய்வ சன்னியத்தியம் விலகி இருக்கும்போது மூலவரை வழிபடக் கூடாது என்பதால்.

இராமேஸ்வரத்தில் உற்சவ வடிவமாக அவரது அம்சமான அனுமன் இருக்கும்போது எப்படி மூல விஸ்வநாதர் உருவத்தை வணங்க முடியும். மூல உரு இருக்க வேண்டியது காசியில். அனுமன் காசியில் சிவ அம்சமாக இருந்தால் தான் விஸ்வநாதரை உற்சவராக இங்கு பிரதிஷ்டை செய்த லிங்கத்தில் ஆரோகணம் செய்து வழிபடலாம் என்பதாலேயே அனுமனைக் காசிக்கு அனுப்பினார். அவர் வருவதற்குள் பூஜை முடித்தார்.

அனுமன் லிங்கம் கொண்டு வந்ததும் அவர் கையாலேயே பிரதிஷ்டை செய்ய வைத்தார். சிவனின் அம்சமான அனுமன் ஸ்தாபித்த சிவலிங்கம். அதனால்தான் முதல் பூஜை அனுமன் லிங்கத்திற்கு பிறகு இரண்டாவதாக தான் பிரதிஸ்டை செய்த லிங்கத்திற்கு நடக்க வேண்டும் என்றார்.

இதேபோன்றே பாபநாசம்- 108 சிவாலயத்திலும் இராமர் பூஜை செய்ய நினைத்தபோதும் இவ்வாறே செய்தார் என்பதை நினைவு கொள்ளுங்கள்.

சிவ அம்சமாக வடிவெடுத்த மாருதி காசிக்கு போய்விட்டு இராமேஸ்வரம் வந்து லிங்கம் பிரதிஸ்டை செய்து வழிபட்டிருக்கும்போது மானிடர்களான நாமும் அதைப் பின்பற்ற வேண்டும் என்பதற்காகவே காசிக்குப் போகிறவர்கள் இராமேஸ்வரத்திற்கும் போகவேண்டும் எனச் சொல்லப்பட்டது.

மகாலட்சுமிதான் சீதையாக அவதாரம் கொண்டவள் என்பது அனைவரும் அறிந்ததே! சிவபக்தனாக இராவணன் இருந்தாலும் மகாவிஷ்ணுவின் மார்பில் உறையும் பாற்கடல் வாசியான மகாலட்சுமியை ஓர் அரக்கன் தூக்கிச் செல்ல முடியுமா! முடியும்! ஏனெனில் சீதை ஓர் மாயை. இராவணன் துறவி வேடமெடுத்து பர்ணசாலை வாயில் நிற்கும்போது அவன் எண்ணங்களை உணர்ந்த சீதை அக்னி தேவனை பிரார்த்திக்கின்றாள். சீதை அக்னிக்குள் ஒளிந்துகொள்ள அக்னிதேவன் அந்த இடத்தில் ஒரு மாயா சீதையை தோற்றுவிக்க அந்தச் சீதையையே இராவணன் தூக்கிச் செல்கின்றான். இந்த மாயா சீதையின் காராணமாகவே ராம-ராவண யுத்தம் நடைபெற்று இராவண சம்ஹாரம் நடைபெறுகிறது.

இராவணன் சீதையைக் கடத்திக் கொண்டு அசோக வனத்தில் வைத்திருந்தபோது எத்தனை முயற்சித்தும் சீதை அவனைத் திரும்பி பார்க்கவில்லை. மற்றவர்கள் ஆலோசனைப் படி தன் உருவத்தை இராமனாக மாற்றினான். அந்த உருவத்துடன் அசோக வனம் சென்று சீதைமுன் நிற்க நினைத்தவன் அங்கு போகமல் தன்னுடைய அந்தப்புரம் சென்று மண்டோதரி முன் நின்றான். யாரோ திடீரென்று தன் முன் வந்து நிற்கின்றார்களே என வெகுண்டு மண்டோதரி எழுந்திருக்க வந்திருப்பது இராவணன்தான், இராமர் உருவத்தில் வந்துள்ளேன் என உணர்த்தினான்.

அப்போது மண்டோதரி நீங்கள் நீங்களாக வராமல் ஏன் மாறுவேடத்தில் வந்துள்ளீர்கள் எனக் கேட்டாள். இராவணன் சொன்னான், நான் உன்னைப் பார்க்க உருமாறி வரவில்லை, சீதையைப் பார்க்க போவதற்காக இப்படி மாறியுள்ளேன் என்றான். அப்படியானால் அங்குதானே போக வேண்டும், இங்கு ஏன் வந்தீர்கள் எனக் கேட்டாள். அது என்ன வென்று தெரியவில்லை. இராமர் உருத்தரித்ததிலிருந்து உன்னைத்தவிர மற்ற ஸ்திரீகளைத் தாயாகப் பார்க்க தோன்றுகிறது. அதனால்தான் சீதையைப் பார்க்கப்போகாமல் இங்கு வந்து விட்டேன் என்றான் இராவணன். ராமாவதாரத்தின் சிறப்பே இது.

பிரமஹத்தி தோஷத்திற்கு பரிஹாரம் செய்து அயோத்தியில் அரசு பொறுப்பேற்றபின் ஓர் சூழலில் சீதை ராமரின் சந்தேகத்தின் பேரில் அக்கினி பிரவேசம் செய்கின்றாள். அக்கினி தான் தோற்றுவித்த மாயா சீதையை பெற்றுக் கொண்டு தம்மிடம் அடைக்கலமாக இருந்த சீதாவை திருப்பி அனுப்புகின்றான். இதனால் உண்மையான சீதைக்கும் இராவணனுக்கும் எந்தவித தொடர்பும் இல்லை. இது பிரம்ம வைவார்த்த புராணம் சொல்வது.

விஷ்ணுவின் ராமாவதாரத்திற்கு உகந்த அரிய சக்தியை அபரிதமாக வழங்கியவள் தாரா. எனவேதான் ராமருடைய மந்திரம் ‘தாரகா மந்திரம்’ எனப்பட்டது.

வாலியைக் கொன்ற பிரமஹத்தி பாவம் தீர இராமர் வழிபட்டது –அன்னியூர்-இராமநாத ஈஸ்வரர். இராவணனைக் கொன்ற பாவம் தீர இராமர் வழிபட்டது- பாபநாசம்-108சிவன்.

ஸ்ரீ ராமரை வழிபட்டால் சூரியன் தோஷம் நீங்கும். அயோத்தியிலிருந்து பல ராமர் கோவில்கள் இருக்கின்றன.

#####

ஞாயிற்றுக்கிழமை, 15 July 2018 11:21

பரசுராம அவதாரம்!

ஓம்நமசிவய!

திகட சக்கரச் செம்முகம் ஐந்துளான்
சகட சக்கரத் தாமரை நாயகன்
அகட சக்கர விண்மணியாவுறை
விகட சக்கரன் மெய்ப்பதம் போற்றுவாம்!

####

பரசுராம அவதாரம்!

ஜமதக்னி முனிவரின் மனைவி ரேணுகாதேவி தினமும் கலைக் கடன்களை முடித்து குளித்துவிட்டு ஆற்று மணலில் குடம்செய்து கணவரின் யாகத்திற்கு நீர் எடுத்துச் செல்வது வழக்கம். ஒருநாள் குடம் செய்ய முற்படும்போது வானில் கார்த்தவீரியார்ஜூனன் என்ற மன்னன் தன் ஆயிரம் கைகளுடன் வானில் செல்வதைப் பார்த்து பிரமித்த ரேணுகாதேவியினால் அன்று மணலில் குடம் செய்யாமல் போக தன் கணவரிடம் செல்ல ஞானதிருஷ்டியில் அனைத்தையும் உணர்ந்த ஜமதக்னி தடம் மாறவில்லை, மனம் தடுமாறிவிட்டாள் என்பதை அறிந்து கற்பில் தவறி விட்டாய் பெண்ணே என்று சொல்லி தன் மகன்களை அழைத்து அவளது சிரசை கொய்யச் சொன்னார்.

முதல் மூவரும் மருகி நிற்க நான்காவதான பார்க்கவன். தாயிற் சிறந்ததொரு கோவிலும் இல்லை என்றாலும் உபநிடத கருத்துப்படி தந்தையின் விந்துதான் தாயின் கருவினுள் போய் முதல் பிறப்பு தந்தையுடையது என்கிறது. தாயின் கருப்பையை கோவிலாக்குவது தந்தையின் பிரதிஷ்டை, அதனால்தான் தந்தை சொல் மிக்க மந்திரமில்லை என்பதால் பிதாவின் வார்த்தைகளை நிறைவேற்றுவது தன் கடமை என்று தன் தாயின் சிரசை கொய்து எடுத்து வந்து தன் தந்தையிடம் சமர்ப்பித்தார்.

பின்னர் தந்தை சொல் மிக்க மந்திரமில்லை என்று செயல் பட்டிருந்தாலும் அவரின் மனம் தாயைக் கொன்ற வேதனை நிறைந்திருந்தது. அப்போது அவரைக் கண்ட ஜமதக்னியிடம், தங்கள் தவ வலிமையால் தாயை உயிர் பிழைக்க வைக்க வேண்டும், மேலும் நடந்தது எதுவும் தாயின் நினைவில் இல்லாமல் குற்றமற்றவளாக விளங்க வேண்டும் என்ற இரண்டு வரங்களைப் பெற்றார்.

பத்தொன்பதாவது சதுர்யுகத் திரேதாயுகத்தில் விஷ்ணு ஜமதக்னிக்கு மகனாகப் பிறந்தார். மகாவிஷ்ணுவின்  அவதாரங்களுள் ஒன்று பார்க்கவன். சிறந்த சிவபக்தர். அவர் சிவனை நோக்கி கடுமையான தவம் மேற்கொண்டிருந்தபோது அவரை சோதிக்க எண்ணங்கொண்டார் சிவபெருமான். வேடன் உருவமெடுத்து தான் கொன்ற மானின் மாமிசத்தை எடுத்து வந்து பரசுராமர் அருகில் வைத்தார்.

முகம் சுழித்த பார்க்கவன் இதை எடுத்துச் செல்லுமாறு வேடனிடம் சொல்ல, தவசிரேஷ்டரே, என்னை ஒன்றும் தூஷிக்க வேண்டாம், என் மனைவி, மக்களின் உணவிற்காக இந்த மாமிசத்தை கொண்டு போகிறேன். இது பிரம்மன் அளித்த உணவு. நாங்கள் உயிர் வாழ வேட்டையாடுகின்றேன் என்று தர்ம நியாயம் பேசினான். மேலும் நீங்கள் உங்கள் தகப்பனார் சொன்னார் என்பதற்காக உன் தாயையே கொன்றாயே. இதை தெரிந்தவர் உங்களை நிச்சயம் பழிப்பர். ஆதலால் நீங்கள் வேறு இடம் சென்று உங்கள் தவத்தை தொடர்ந்து செய்க என்றான்.

ஒரு வேடன் தன் செயலை அறிவது என்றால். அதிர்ச்சியடைந்தார் பரசுராமர். இவன் சாமான்யன் இல்லை என்ற நினைவு பார்க்கவனை தட்டி எழுப்ப, வேடனே நீயார்! சாதாரன வேடன் இப்படி அறிவு சார்ந்த கேள்வியை கேட்க முடியாது! தயவு செய்து நீ உன் சுய உருவை காட்டு என வேண்ட பரமேஸ்வரன் காட்சியளித்து அருள். பார்க்கவனே! நீ கேட்ட சாஸ்திர அஸ்திரங்களை உனக்கு வழங்குகின்றேன் அவற்றை நிர்வகிக்கும் ஆற்றலை பெற நீ தீர்த்த யாத்திரை சென்று ஸ்தல தேவதைகளை உபாசனை மேற்கொள் என்றார். அவ்வாறே பல தலங்களுக்கு யாத்திரை சென்று வழிபட்டு கைலாயத்தில் தன் தவத்தினை தொடர்ந்தார்.

முகலு என்ற அரக்கியால் துயறுற்ற தேவர்கள் ஈசனிடம் சென்று அவளிடமிருந்து காப்பாற்ற வேண்டினர். பெருமான் பார்க்கவனிடம் சென்று பார்க்கவ உன்னிடம் வலிமை இருக்கின்றது. இப்போது தவத்தின் சக்தியும் சேர்ந்துள்ளது. நான் தரும் இந்த பரசை-கோடாரியை ஆயுதமாக வைத்துக் கொள். எல்லா வெற்றியும் அடைந்து சித்திக்க என் ஆசீர்வாதம் தேவர்களை துன்புறுத்திய அரக்கி முகலுவை சம்ஹாரித்து தேவர்களுக்கு உதவி செய்க என்று அருள் புரிந்து பார்க்கவன் என்ற அவன் பெயர் கொண்ட பார்க்கவாஸ்திரத்தை தந்தருளினார். பார்க்கவன் பெருமான் தனக்கு அளித்த பரசை ஆயுதத்தால் முகலு அரக்கியை சம்ஹாரம் செய்தார். அன்றிலிருந்து பார்க்கவன் பரசுராமர் எனப் பெயர் பெற்றார்.

விண்ணில் பறந்த கர்த்தவீர்யாஜுனன் ஜமதக்னியை கொல்ல, அவனையும் அவன்பின் தோன்றிய 21 தலைமுறை சத்திரியர்களையும் பரசுராமர் கொன்றார். ஸ்ரீராமர் சீதாவை திருமணம் செய்து கொண்டு போகும் வழியில் அவரைப் போட்டிக்கு அழைத்து அவரிடம் தோற்று தனது தவ வலிமையை ராமருக்கு தாரை வார்த்துக் கொடுத்தார். குருசேத்திரத்தில் சியமந்த பஞ்சகம் என்ற குளத்தை வெட்டி பித்ருக்களுக்கு தர்ப்பணம் செய்தார். அசுரர்களைக் கொன்ற பாவம் தீர அசுவமேத யாகம் செய்தார். கோகர்ணம் நீரில் மூழ்கியபோது முனிவர்களின் வேண்டு கோளுக்கிணங்க சமுத்திர ராஜனை அழைத்து கோகர்ணத் தலத்தை விட்டு நான்கு புறமும் விலகி இருக்க வேண்டி மீண்டும் முனிவர்கள் கோகர்ணேஸ்வரரை வழிபட வழிவகைச் செய்தார். தன்னிடம் இருந்த மற்ற பூமிப் பகுதிகளைத் தானம் செய்துவிட்டு தான் வசிக்க தவம் புரிய மகேந்திர பர்வதம் சென்றார்.

பரசுராமர் வழிபாடு சுக்கிரன் தோஷம் நீங்கும். பெரும்பாலான திருத்தலங்களில் தசாவதாரச் சன்னதிகளில்.

விஷ்ணுவின் பரசுராமாவதாரத்திற்கு உகந்த அரிய சக்தியை அபரிதமாக வழங்கியவள் மாதங்கி.

#####

புகைப்பட தொகுப்பு

வீடியோ தொகுப்பு

தலைவர்

குருஜி கயிலைமணி ப.கோவிந்தராஜன்.
துணைக்கோட்டப் பெறியாளர்
(பணி ஓய்வு). பி.எஸ்.என்.எல்.
ஈரோடு-638 001.
-94428 36536,75982 36536.
-0424 2280142
Email:[email protected]

மேலும் அறிய...

செயலாளர்

மா.முத்துச்சாமி.
மக்கள் செய்தி தொடற்புத் துறை
(பணி ஓய்வு).
ஈரோடு-638 001.

மேலும் அறிய...

பொருளாளர்

கோ.ரவிசங்கர். எம்.இ., எம்.பி.ஏ
என்ஜினியரிங் மேனேஜர்.
எல்& டி. கட்டுமானப்பிரிவு,
சென்னை-600 089.

மேலும் அறிய...

அறங்காவலர்

ம.செந்தில் இளவரசன்.
உரிமையாளர், ‘இந்தியன்’ உதிரி பாகங்கள்.
தாம்பரம்-600 048.

மேலும் அறிய...

பொருளடக்கம்

7881771
All
7881771
Your IP: 162.158.63.110
2018-07-19 11:12

செய்திமடல்

புகுபதிகை படிவம்

 

tree-3.jpg tree-1.jpg tree-2.jpg
orrgan-3.jpg organ-2.jpg orrgan-1.jpg
eye2.jpg eye3.jpg eye1.jpg
blood-03.jpg blood-02.jpg blood-01.jpg